- સમગ્ર ઘટના સીસીટીવીમાં કેદ થતા પોલીસે તે દિશામાં વધુ તપાસ હાથ ધરી

વડોદરા શહેરના કારેલીબાગ વિસ્તારમાં આવેલ ચાણક્ય કોમ્પ્લેક્સમાં ફરી એક વખત તસ્કરોએ પાંચ જેટલી દુકાનોના તાળાં તોડી ચોરીની ઘટનાને અંજામ આપતા દુકાન સંચાલકોમાં દોડધામ મચી જવા પામી હતી. જોકે આ સમગ્ર ઘટના સીસીટીવીમાં કેદ થતા પોલીસે તે દિશામાં વધુ તપાસ હાથ ધરી છે.

કારેલીબાગ વિસ્તારમાં આવેલ ચાણક્ય કોમ્પ્લેક્સમાં બેઝમેન્ટ તથા ગ્રાઉન્ડ ફ્લોરની મળી કુલ પાંચ દુકાનોના તાળા તોડી તસ્કરોએ ચોરીની ઘટનાને અંજામ આપતા ચકચાર મચી જવા પામી છે. તસ્કરોએ કપડાની દુકાન, રિયલ એસ્ટેટની ઓફિસ, ડાન્સ ક્લાસ સહિતની દુકાનોને નિશાન બનાવી ચોરીની ઘટનાને અંજામ આપ્યો છે. હાલ તસ્કરો નાની મોટી ચીજ વસ્તુની ચોરી કરી ગયા હોવાની માહિતી જાણવા મળી છે. ઘટનાના પગલે પોલીસ સ્થળ પર દોડી ગઈ છે. તપાસ બાદ ચોક્કસ રકમની સ્પષ્ટતા થશે.

ગત મોડીરાત્રે 11:00 કલાકે બે તસ્કરોએ ત્રાટકી ચોરીની ઘટનાને અંજામ આપતા સમગ્ર ઘટના સીસીટીવીમાં કેદ થવા પામી છે. ઘટનાની જાણ થતા વહેલી સવારે દુકાન સંચાલકોમાં દોડધામ મચી જવા પામી હતી. અને એક વર્ષમાં આ ચોરીની ત્રીજી ઘટના ઘટતા વેપારીઓમાં સુરક્ષા મુદ્દે નારાજગી જોવા મળી હતી.