વડોદરાના વાઘોડિયા રોડ પરથી પોલીસે વિદેશી દારૂ સાથે મધ્યપ્રદેશના બે ઇસમોને ઝડપી પાડી વધુ કાર્યવાહી હાથ ધરી છે.
વડોદરા શહેરની પાણીગેટ પોલીસની ટીમ વિસ્તારમાં પેટ્રોલીંગમાં હતી. તે દરમિયાન પોલીસને વાઘોડીયા રોડ જીવનનગર વુડાના મકાન પાસે સિલ્વર કલરની મોપેડમાં બે ઈસમો પાસે વિદેશી દારૂ હોવાની બાતમી મળી હતી.
જે બાતમીના આધારે પાણીગેટ પોલીસની ટીમે દરોડો પાડી મોપેડની તપાસ હાથ ધરી હતી. ત્યારે મોપેડમાંથી વિદેશી દારૂના ક્વાટરીયા મળી આવ્યા હતા. ત્યારે પાણીગેટ પોલીસે મહાવિર રમેશભાઇ ભૈડીયા (રહે. ગામ ખેરવાડા, નીચલા ફળીયા, જી.અલીરાજપુર, મધ્યપ્રદેશ) અને રાહુલ કમસિંહ કનેશ (રહે. ગામ કિટી હોલી, જી. અલીરાજપુર,મધ્યપ્રદેશ)ને ઝડપી પાડ્યા હતા. પોલીસે ૨૮,૩૫૦ની કિંમતનો વિદેશી દારૂ, મોપેડ અને મોબાઈલ ફોન મળી કુલ ૮૮,૩૫૦ની કિંમતનો મુદ્દામાલ જપ્ત કરી બંને આરોપીઓની ધરપકડ કરી હતી.
