વડોદરા શહેર કોંગ્રેસ સેવાદળ દ્વારા આજરોજ 77મા સ્વતંત્રતા દિવસ નિમિત્તે શહેરના દાંડિયા બજાર રોડ સ્થિત કોંગ્રેસ કાર્યાલય ખાતે ધ્વજવંદનનો કાર્યક્રમ તથા મહર્ષિ અરવિંદની જન્મજયંતી નિમિત્તે પુષ્પાંજલિનો કાર્યક્રમ યોજવામાં આવ્યો હતો.
આજે સમગ્ર દેશભરમાં 77મા સ્વાતંત્ર્ય દિવસની હર્ષોલ્લાસ સાથે દેશભક્તિના માહોલમાં ઉજવણી કરવામાં આવી રહી છે ત્યારે વડોદરા શહેર કોંગ્રેસ સેવાદળ દ્વારા આજરોજ શહેરના દાંડિયા બજાર રોડ સ્થિત લકડીપુલ ખાતે આવેલા કોંગ્રેસના મુખ્ય કાર્યાલય ખાતે ધ્વજવંદનનો કાર્યક્રમ યોજવામાં આવ્યો હતો. કોંગ્રેસના વડોદરા શહેર પ્રમુખ ઋત્વિજ જોશીના વરદહસ્તે ધ્વજવંદન કાર્યક્રમ યોજવામાં આવ્યો હતો. સાથે સાથે જ આજે ક્રાંતિકારી, કવિ તથા યોગમાં નિપુણ એવા જેમનો વડોદરા સાથે નાતો રહ્યો હતો. તેવા રાજકીય અને સામાજિક ચિંતક એવા મહર્ષિ શ્રી અરવિંદ ઘોષની જન્મજયંતી નિમિત્તે કોંગ્રેસના પદાધિકારીઓ તથા કાર્યકરો દ્વારા મહર્ષિની તસ્વીર પર પુષ્પમાળા પહેરાવવામાં આવી હતી અને તેઓને યાદ કરવામાં આવ્યા હતા. સાથે જ કોંગ્રેસના પીઢ નેતા મૌલીનભાઇ વૈષ્ણવના નિધનના માનમાં બે મીનીટનું મૌન રાખવામાં આવ્યું હતું.
આ પ્રસંગે વડોદરા શહેર કોંગ્રેસ પ્રમુખ ઋત્વિજ જોશીએ દેશની આઝાદીમાં કોંગ્રેસના નેતાઓ તથા પૂર્વે દિવંગત વડાપ્રધાનોના દેશ માટેના યોગદાનને યાદ કરવામાં આવ્યા હતા સાથે જ આજે સ્વતંત્રતા દિવસ નિમિત્તે કોંગ્રેસ પરિવાર તેમજ સૌ દેશવાસીઓને શુભેચ્છાઓ પાઠવી હતી. તેમણે દેશભક્તિ નિમિત્તે દેશગીત પણ રજૂ કર્યુ હતું.
આ પ્રસંગે વડોદરા શહેર કોંગ્રેસ પ્રમુખ ઋત્વિજ જોશી, નેતા અમીબેન રાવત, પૂર્વ વિપક્ષી નેતા અને વર્તમાન મ્યુનિસિપલ કાઉન્સિલર ચંદ્રકાન્ત શ્રીવાસ્તવ, મ્યુનિસિપલ કાઉન્સિલરો બાળુભાઇ સૂર્વે, જહાભાઇ ભરવાડ, પુષ્પાબેન વાઘેલા, હરેશ પટેલ, પૂર્વ વડોદરા શહેર પ્રમુખ પ્રશાંત પટેલ, ચિરાગભાઇ ઝવેરી, લાલસિંહ પઢીયાર સહિતના કોંગ્રેસના પૂર્વ તથા વર્તમાન પદાધિકારી, પૂર્વ કાઉન્સિલરો તથા કોંગ્રેસના કાર્યકરો ઉપસ્થિત રહ્યાં હતાં.
