- આગ એટલી વિકરાળ હતી કે, અન્ય બે કંપનીઓ પણ આગની ઝપેટમાં આવી ગઇ

- આગ લાગવાનું કારણ હાલ અકબંધ, કોઈ જાનહાનિ થઇ ન હોવાનું જાણવા મળ્યું

અંકલેશ્વર ખાતે GIDCમાં આવેલ પેકેજીંગ કંપનીમાં વહેલી સવારે એકાએક ભીષણ આગ ફાટી નીકળતા 5 કિમી સુધી ધૂમાડાના ગોટે ગોટા જોવા મળ્યા હતા. જોત જોતામાં આગે વિકરાળ સ્વરૂપ ધારણ કરી લેતાં આસપાસમાં આવેલ અન્ય બે કંપનીઓ પણ આગની ઝપેટમાં આવી જતા અફરાતફરી મચી ગઈ હતી. બનાવ અંગેની જાણ ફાયર વિભાગને થતા DPMCના 11થી વધુ ફાયર ટેન્ડરો આગ પર કાબુ મેળવવાની કામગીરીમાં જોતરાઈ ગયા છે.

અંકલેશ્વર GIDCમાં આવેલી લાકડાના બેલેટ બનાવતી જયંત પેકેજીંગ કંપનીમાં આજે વહેલી સવારે એકાએક અગમ્ય કારણોસર આગ ફાટી નીકળી હતી અને આગે જોતજોતામાં વિકરાળ સ્વરૂપ ધારણ કરી લેતા કંપનીમાં અફરાતફરી મચી ગઈ હતી. આગ અંગેની જાણ ફાયર વિભાગને કરવામાં આવતા પાનોલી, અંકલેશ્વર સહિતના ફાયર લાશ્કરો ઘટના સ્થળે દોડી આવ્યા હતા અને પાનોલી ડીપીએમસી, અંકલેશ્વર ડીપીએમસીના ફાયર ટેન્ડરો દ્વારા આગ સતત પાણીનો મારો ચલાવી આગ પર કાબુ મેળવવાના પ્રયાસો હાથ ધરવામાં આવ્યા છે.

લાકડાના બેલેટ બનાવતી જયંત પેકેજીંગ કંપનીમાં લાગેલ આગ એટલી વિકરાળ હતી કે, જોતજોતા માં આગે આસપાસમાં આવેલ અન્ય બે નાની કંપનીઓને પણ પોતાની ઝપેટમાં લઇ લીધી હતી. ઘટનાની જાણ થતા જ જીપીસીબી, એસડીએમ, DISHની ટીમ ઘટના સ્થળે દોડી આવી હતી. ફાયર લાશ્કરોની ભારે જેહમત બાદ પણ હાલ આગ પર કાબુ મેળવવામાં સફળતા મળી નથી અને આગ લાગવાનું કારણ હાલ અકબંધ છે. હજુ સુધી આગના બનાવમાં કોઈ જાનહાનિ ના થઇ હોવાનું સામે આવ્યું નથી.