- સયાજીગંજ પોલીસે બાતમી આધારે પરશુરામ ભઠ્ઠા સ્થિત સુભાષનગર ચાર રસ્તા પાસેથી આરોપીને ઝડપી પાડ્યો

વડોદરા સયાજીગંજ વિસ્તારમાંથી ચોરીની બાઇક સાથે સોશિયલ મીડિયા વિડીયો બનાવી ફેમસ થયેલો યુવક ઝડપાયો છે. નંબર વગરની મોટરસાયકલનું વેચાણ કરવા અર્થે ફરતો હતો તે દરમિયાન રેલ્વે ગરનાળા પાસેથી સયાજીગંજ પોલીસે દબોચી લીધો હતો.

સયાજીગંજ પોલીસ સ્ટેશનના સ્ટાફના માણસો વાહનચોરીના ગુનાઓ અટકાવવા તેમજ અન ડીટેક્ટ ગુનાઓ શોધી કાઢવા માટે સયાજીગંજ વિસ્તારમાં પેટ્રોલીગમાં હતા. આ દરમિયાન સ્ટાફના જવાનોને બાતમી મળી હતી કે, એક શખ્સ ચોરીની નંબર પ્લેટ વગરની મોટર સાયકલ લઇને અકોટાથી પરશુરામ ભઠ્ઠા તરફ આવી રહ્યો છે, અને મોટરસાઇકલ વેચવાની ફિરાકમાં ફરી રહ્યો છે. સયાજીગંજ પોલીસે બાતમી આધારે પરશુરામ ભઠ્ઠા સ્થિત સુભાષનગર ચાર રસ્તા પાસે વોચ ગોઠવી હતી. આ દરમ્યાન બાતમી મુજબનો શખ્સ મોટર સાયકલ ઉપર રેલ્વે ગરનાળા તરફથી સુભાષનગર તરફ આવતો જણાયો હતો. જેથી પોલીસે તેને ઊભો રાખી તેની પાસે રહેલી મોટર સાયકલની આગળ પાછળ જોતા નંબર પ્લેટ લગાવેલ ન હતી. 

પોલીસે પકડાયેલા શખ્સ પાસે મોટર સાયકલની આર. સી. બુક તેમજ કોઈ દસ્તાવેજો રજૂ કરવાનું જણાવતા તે ગલ્લા-તલ્લા કરી કોઈ સંતોષકારક જવાબ આપ્યો ન હતો. જેથી પોલીસે તેની કડકાઇથી પૂછપરછ કરતા મોટર સાયકલ કમાટીબાગ રોડ ખાતેથી ચોરી કરી લાવેલ હોવાનું કબૂલ્યું હતું. જેથી પોલીસે મોટર સાયકલ કબજે લઇ રેમલભાઇ ટોલીયાભાઇ ડામોર (ઉ.વ. 22, હાલ રહે. કોર્પોરેશનની ઝુંપડપટ્ટી, કલાલી ફાટક પાસે, વડોદરા અને મુળ રહે. ડાન્ડી, છોટી ગામ, તા.સજ્જનગઢ, જી-બાસવાડા, કસારવાડી પોલીસ સ્ટેશન, રાજસ્થાન)ની ધરપકડ કરી આગળની કાર્યવાહી હાથ ધરી છે.