- અકોટા પોલીસે યુવકની અટકાયત કરીને 13.5 ઇંચ લાંબું ખંજર જપ્ત કર્યું

શહેરના ગદાપુરા વિસ્તારમાં જાહેરમાં ખંજર વડે કારના બોનેટ પર બેસી કેક કાપતા યુવકનો વીડિયો વાઇરલ થયો હતો. જેને પગલે અકાટા પોલીસે તેને પકડી પાડ્યો હતો. પોલીસે યુવક પાસેથી 13.5 ઈંચનું ખંજર કબ્જે કરીને તેને પોલીસ સ્ટેશને લાવી કાન પકડાવીને માફી મગાવી હતી.

શહેરના ગદાપુરા વિસ્તારમાં એક યુવક કારના બોનેટ પર બેસીને જાહેરમાં ખંજરથી કેક કાપીને જન્મ દિવસની ઉજવણી કરતો હોવાનો વીડિયો વાઇરલ થયો હતો. અકોટા પોલીસે આ વીડિયોના આધારે યુવકને ઉત્કર્ષ વિદ્યાલયની બાજુમાં આવેલા સ્લમ ક્વાર્ટર્સ ખાતેથી શોધી કાઢ્યો હતો. યુવકને તેના જન્મદિવસની ઉજવણી બાબતે પૂછપરછ કરતાં તેણે કહ્યું હતું કે, ગત 24 ઓક્ટોબરના રોજ તે જન્મદિવસની ઉજવણી કરતો હતો. તેણે જાહેરમાં ખંજરથી કેક કાપી હતી. જેથી પોલીસે તે ખંજર બાબતે પૂછતાં તેણે પોતાની પાસે હોવાનું જણાવ્યું હતું. પોલીસે યુવક હિમાલય ઉર્ફે વિશાલ સંગીતભાઈ જાદવને અટકાયત કરી હતી. તેની પાસેથી 13.5 ઈંચનું ખંજર પણ જપ્ત કર્યું હતું. પોલીસે યુવક સામે જીપી એક્ટ 135 મુજબ ગુનો નોંધીને કાર્યવાહી હાથ ધરી હતી. બીજી તરફ તે યુવકને અકોટા પોલીસ સ્ટેશન ખાતે લાવીને કાન પકડાવીને માફી પણ મગાવી હતી.