- ક્રાઇમ બ્રાન્ચ પોલીસને ઝહીર ઉર્ફે ભુરીયો સિકંદર શેખ ભરૂચમાં હોવાની વિગતો મળતા દરોડો પાડી ઝડપી પાડ્યો

વડોદરાના તુલસીવાડી વિસ્તારમાં ડ્રગ્સ સાથે પકડાયેલા એક કેરિયરના ફરાર થઈ ગયેલા સાગરીતને ક્રાઇમ બ્રાન્ચ પોલીસે ભરૂચથી ઝડપી પાડ્યો છે.

વડોદરા શહેરના તુલસીવાડીના રોશનનગર ખાતે એક મકાનમાં ડ્રગ્સનું વેચાણ કરવામાં આવી રહ્યું હોવાની વિગતોને પગલે ગઈ તારીખ 26 જુને એસઓજીની ટીમે દરોડો પાડ્યો હતો. પોલીસે સાજીદઅલી પઠાણને ઝડપી પાડી રૂપિયા 5.50 લાખની કિંમતનું 54 ગ્રામથી વધુ મેફેડ્રોન ડ્રગ્સ કબજે કર્યું હતું. પોલીસે રોકડા રૂપિયા 29,500 અને મોબાઈલ પણ કબજે કર્યા હતા. પકડાયેલા ડ્રગ્સ પેડલરની સાથે તેનો મિત્ર ઝહીર ઉર્ફે ભુરીયો સિકંદર શેખ (રોશનનગર, તુલસીવાડી) પણ સંડોવાયો હોવાની વિગતો જાણવા મળતા પોલીસે તેની શોધખોળ કરી હતી. ઝહીર ઉર્ફે ભુરીયો સિકંદર શેખ ભરૂચમાં હોવાની વિગતો મળતા ક્રાઇમ બ્રાન્ચ પોલીસે દરોડો પાડી તેને ઝડપી પાડ્યો છે. આ ગુનામાં હજી મુંબઈનો ડ્રગ સપ્લાયર વોન્ટેડ છે.