- ફાયરબ્રિગેડે પાણીનો મારો ચલાવી આગ કાબૂમાં લીધી હતી

વડોદરા શહેરના ફતેગંજ વિસ્તારમાં આવેલ ધ ચોકલેટ રૂમ રેસ્ટોરામાં આજે સવારે આગ ભભૂકી હતી. જોકે, આ ઘટનામાં કોઇને ઇજા કે જાનહાનિ થઈ નથી.

વડોદરાના ફતેગંજમાં આવેલ ધ ચોકલેટ રૂમ રેસ્ટોરામાંથી આજે સવારે 8 વાગ્યા આસપાસ ધુમાડા નિકળતા દેખાયા હતા. જેથી આ રેસ્ટોરાની ઉપર આવેલી કલ્યાણ હોટલના કર્મચારીએ આગ લાગ્યાની જાણ કરી હતી. જેથી ફાયરબ્રિગેડનો કાફલો ઘટનાસ્થળે દોડી આવ્યો હતો અને પાણીનો મારો ચલાવી આગ કાબૂમાં લીધી હતી.

પ્રથમ દ્રષ્ટિએ આગ શોર્ટ સર્કિટના કારણે લાગી હોવાનું માનવામાં આવી રહ્યો છે. કારણ કે, આગ લાગી ત્યારે રેસ્ટોરા બંધ હતી અને જ્યારે આગ લાગતા ધુમાડા બહાર નિકળ્યા ત્યારે રેસ્ટોરાનું શટર ખોલતા ફૂડ મુકવાનું મશીન સળગી રહ્યું હતું. જેની આગે રેસ્ટોરાની ખુરશીઓ અને ફર્નિચરને લપેટામાં લીધા હતા. તેમજ એસી પણ બળી ગયા હતા. જો કે આગના બનાવમાં કોઇને ઇજા કે જાનહાની થઇ નથી.