વડોદરા શહેરના મદનઝાંપા પર રોડ પાસેથી પોલીસે દારૂનો જથ્થો ભરી પસાર થતા કાર ચાલકને ઝડપી પાડી રૂ.25 હજાર ઉપરાંતની કિંમતના દારૂના જથ્થો સહિત રૂ. 2.75 લાખ ઉપરાંતનો મુદ્દામાલ કબજે કરી સપ્લાયરને વોન્ટેડ જાહેર કર્યો છે.
શહેરના નવાપુરા પોલીસ સ્ટેશનની ટીમના જવાનો પેટ્રોલિંગમાં હતા. તે સમયે ચોક્કસ માહિતી મળી હતી કે, સફેદ કલરની કારમાં વિદેશી દારૂનો જથ્થો વીર ભગતસિંહ ચોકથી પથ્થરગેટ થઈ મદનઝાંપા રોડથી પસાર થવાનો છે. જેના આધારે પોલીસે મદનઝાંપા રોડ સાઈમંદિર કોમ્પલેક્ષની પાસે વોચ ગોઠવી બાતમી મુજબની કારને રોકી કાર ચાલક નીતિન મધુસુદનભાઈ ભોઇ (રહે- જમના રેસીડેન્સી, આજવા-વાઘોડિયા રીંગ રોડ) ને ઝડપી પાડ્યો હતો. પોલીસે કારની તલાસી લેતા કારની ડેકીમાંથી ભારતીય બનાવટની વિદેશી દારૂની 88 બોટલ તથા 43 ક્વોટર મળી આવ્યા હતા.
નવાપુરા પોલીસે રૂપિયા 25,540ની કિંમત ધરાવતો દારૂનો જથ્થો અને કાર સહિત કુલ રૂપિયા 2,75,540 નો મુદ્દામાલ કબજે કર્યો હતો. તેમજ આરોપીએ આ દારૂનો જથ્થો નિલેશ ઉર્ફે નીલુ હરેશભાઈ નાથાણી પાસેથી લાવ્યો હોવાની કબુલાત કરતા પોલીસે તેને વોન્ટેડ જાહેર કર્યો છે.
