- પોલીસે કારમાં તપાસ કરતા દારૂની એક બોટલ મળી

શહેરના સયાજીગંજ વિસ્તારમાંથી સીગ્નેચર કાફે પાસેના જાહેર રોડ ઉપરથી પોલીસે કારતૂસ વિનાના પિસ્તોલ અને દારૂની બોટલ સાથે અમદાવાદના એક શખ્સની ધરપકડ કરી કાયદેસરની કાર્યવાહી હાથ ધરી છે.

વડોદરામાં સયાજીગંજ પોલીસની ટીમ પેટ્રોલિંગમાં હતી. આ દરમિયાન બાતમી મળી હતી કે, સિગ્નેચર કાફે પાસે રોડ પર એક શખ્સ પિસ્તોલ જેવું હથિયાર કમરે ભેરવી ઉભો છે, અને અલગ-અલગ કલરનો ઉભા પટ્ટાવાળુ આખી બાયનું શર્ટ તથા કમરે બ્લ્યુ કલરનું પેન્ટ પહેરેલ છે. જેથી પોલીસ તાત્કાલિક ઘટના સ્થળે પહોંચી હતી અને ઉપરોક્ત વર્ણનવાળા ઊભેલા શકમંદને અટકાયતમાં લઇ તેની પૂછપરછ હાથ ધરી હતી. જેમાં આરોપી પાસેથી કમરના ભાગે લટકાવેલ કારતૂસ વિનાની પિસ્તોલ મળી આવી હતી. તેમજ તેની પૂછપરછ કરતાં તેનું નામ સમીરભાઇ હસમુખભાઇ શાહ (ઉ.વ. 60, રહે. શ્રીહરી બ્લેસિંગ, કર્ણાવતી એપાર્ટમેન્ટ-2ની સામે, નારોલ-લાંભા રોડ, અમદાવાદ)નો રહેવાસી હોવાનું જાણવા મળ્યું હતું.

પોલીસે સમીર શાહ અમદાવાદથી વડોદરા આઇ-20 કાર લઇને આવ્યો હતો, તેની પણ તપાસ કરી હતી. જેમાં કારમાંથી દારૂની એક બોટલ પણ મળી આવી હતી. આમ પોલીસે અમદાવાદના સમીર શાહની પિસ્તોલ, દારૂની બોટલ અને કાર સાથે ધરપકડ કરી છે.