વડોદરાના લક્ષ્મીપુરા રોડ પર શ્રીજી ટેનામેન્ટના રહેણાક મકાનમાં ગોરવા પોલીસે રેડ કરીને 42 હજારના વિદેશી દારૂ તથા બિયરના ટીન સાથે એક મહિલાને ઝડપી પાડવામાં આવી હતી.
વડોદરા શહેરના ગોરવા પોલીસ સ્ટેશનનો સ્ટાફ વિસ્તારમાં પેટ્રોલિંગની કામગીરી કરી રહ્યા હતા. તે દરમિયાન બાતમી મળી હતી કે લક્ષ્મીપુરા-ગોરવા રોડ પર સી. કે. પ્રજાપતિ સ્કૂલની પાછળ આવેલા શ્રીજી ટેનામેન્ટના રહેણાક મકાનમાં વિદેશી દારૂનો જથ્થો સંતાડી રાખ્યો છે. જેના આધારે પોલીસન ટીમે બાતમી મુજબના સ્થળ પર રેડ કરતા સ્થળ પરથી એક મહિલા મળી આવી હતી. તેને સાથે રાખીને ઘરમાં તપાસ કરતા બેડરૂમમાંથી એક થેલામાંથી વિદેશી દારૂની બોટલો તથા બિયરના ટીન મળી આવ્યા હતા. જેથી પોલીસે સ્થળ પરથી 42 હજારના વિદેશી દારૂ સહિતના મુદ્દામાલ સાથે મહિલાની ધરપકડ કરાઈ હતી. મહિલા કોની પાસેથી દારૂનો જથ્થો લાવી હતી તેની પૂછપરછ કરાઈ હતી.
