શહેરના ગોરવા સમતા વિસ્તારમાં પોલીસે એક મકાનમાં દરોડો પાડી પાંચ જુગારીયાઓને ઝડપી પાડયા હતા.
શ્રાવણીયા જુગારના રોજેરોજ કેસ નોંધાઇ રહ્યા છે ત્યારે ગઇકાલે પોલીસને આવી જ રીતે સમતા વિસ્તારના અમૃત નગરના મકાનમાં જુગારખાનું ચાલતું હોવાની માહિતી મળતાં દરોડો પાડયો હતો. પોલીસે જુગારીયાઓને પોતાના મકાનમાં બોલાવી જુગાર રમાડતા શૈલેષ ઉર્ફે શીવો ગોવિંદભાઇ રાવળ, જગદીશ ઉર્ફે અમન ચિત્રબહાદૂર થાપા (રહે. વૈકુંઠ ફ્લેટ, અમૃત નગર પાસે), પ્રકાશ ઉર્ફે પકીયો મગનભાઇ ડોડીયા (રહે. વ્રજભૂમિ સોસાયટી, અમૃત નગર પાસે), આરીફ સાબીરભાઇ દિવાન (રહે. મધુનગર વસાહત, કરોડીયારોડ) અને ગૌતમ ઉર્ફે ભરત કાન્તિલાલ સાવલીયા (રહે. વલ્મિકી નગર, ગોરવા)ને ઝડપી પાડી રોકડા રૂપિયા ૧૭૧૮૦ અને ચાર મોબાઇલ સહિત કુલ રૂપિયા ૩૨ હજારની મત્તા કબજે કરી હતી.
