શહેરના કિશનવાડી-ખોડિયાર ચોક નજીક આંક ફરકનો જુગાર રમાડતા બે ઇસમોને શહેરના વારસિયા પોલીસે ઝડપી પાડીને 10 હજાર ઉપરાંતનો મુદ્દામાલ કબજે લીધો હતો.
પ્રાપ્ત માહિતી અનુસાર વડોદરા શહેરના વારસીયા પોલીસ મથકના સ્ટાફને બાતમી મળી હતી કે, કિશનવાડી વિસ્તારમાં આવેલા ખોડિયાર ચોક પાસે ઝુપડા નજીક બેસીને કેટલાક વ્યક્તિઓ આંક ફરકનો જુગાર રમાડી રહ્યા છે. જે બાતમીના આધારે પોલીસે સ્થળ પર જઈને તપાસતા રાવજી કાલિદાસ વસાવા તેમજ રમેશ ગોરધનભાઈ માછી સ્થળ પરથી મળી આવ્યા હતા. જ્યાં તેઓ પાસે આંક ફરકનો જુગાર રમાડવાનું સાહિત્ય, ચિટ્ઠી તેમજ રોકડ રકમ મળી આવી હતી. પોલીસે 10 હજાર રોકડ તેમજ રૂપિયા 3500નો મોબાઈલ ફોન મળીને 13 હજાર ઉપરાંતનો મુદ્દામાલ કબજે લીધો હતો.
