- પોલીસે બે બેટરી, ઓટો રિક્ષા સહિત 94 હજારનો મુદ્દામાલ જપ્ત કર્યો

વડોદરા શહેરના ગોરવા પોલીસે લક્ઝરી બસમાંથી બેટરીની ચોરી કરનાર એક રીક્ષા ચાલકને ચોરીની બે બેટરી તેમજ રિક્ષા સાથે ઝડપી પાડ્યો હતો. ચોરેલી બેટરી વેચવાના ફિરાકમાં ફરતો તસ્કર બેટરી વેચે તે પહેલા જ પોલીસના હાથે ઝડપાઈ ગયો હતો.

વડોદરા શહેરના ગોરવા પોલીસ મથકના સ્ટાફને બાતમી મળી હતી કે, નૂરાની પાર્ક સોસાયટી, કરોડિયા રોડ પર રહેતો મુલતાની ફરીદ ફિરોજભાઈ ભાડાની ઓટોરિક્ષામાં બે મોટી બેટરી લઈને વેચવાના ઇરાદે ફરી રહ્યો છે અને હાલ તે જશકાકાના ખેતર પાસે રિક્ષામાં બેઠો છે. જે બાતમીના આધારે ગોરવા પોલીસના સ્ટાફે સ્થળ પર જઈને તેની ધરપકડ કરતા તેમાં બે નંગ બેટરી મળી આવી હતી.આ બેટરી ક્યાંથી લાવ્યા તે અંગે પોલીસને પૂછપરછ કરતા ગત 19 જુલાઈના રોજ બપોરના 2:30 વાગ્યાની આસપાસ મધુનગર ચાર રસ્તા પાસે દરબાર ટ્રાવેલ્સ લખેલી લક્ઝરી બસની ડેકી તોડીને તેમાં ફીટ કરેલી બેટરીઓ ચોરી કરી હોવાની કબુલાત કરી હતી.

ગોરવા પોલીસે આરોપી મુલતાની ફરીદ ફિરોજભાઈની ધરપકડ કરી ચોરીની બેટરી નં.2 જેની કિંમત રૂપિયા 19 હજાર તેમજ ગુનામાં વપરાયેલ ઓટો રીક્ષા કિંમત 75 હજાર મળી કુલ રૂપિયા 94,000નો મુદ્દામાલ જપ્ત કર્યો હતો.