- ભીમપુરા-શેરખી ગામમાં રાત્રિના સમયના સીસીટીવી ફૂટેજ વાઇરલ થયા

વડોદરા શહેર નજીક આવેલા ભીમપુરા ગામમાં છેલ્લા કેટલાક સમયથી તાલુકા પોલીસના બદલે બુકાનીધારી ત્રિપુટી બાઇક ઉપર નાઇટ પેટ્રોલિંગ કરી રહી હોય તેવા દૃશ્યો સામે આવ્યા છે. ગ્રામજનોની ઊંઘ હરામ કરી રહેલી તસ્કર ત્રિપુટી સીસીટીવીમાં કેદ થઇ ગઇ છે. સોશિયલ મીડિયામાં વાઇરલ થયેલા સીસીટીવી ફૂટેજના આધારે પોલીસે તપાસ શરૂ કરી છે.

મળેલી માહિતી મુજબ વડોદરા તાલુકામાં આવેલા ભીમપુરામાં રાત્રિના સમયે બાઇક પર તસ્કરોના આટાફેરાના સીસીટીવી સામે આવ્યા છે. સામાન્ય રીતે પોલીસે રાત્રે પેટ્રોલીંગ કરવાનું હોય છે, પરંતુ તેમની જગ્યાએ તસ્કરો સીસીટીવીમાં ત્રિપલ સવારી નજરે પડી રહ્યા છે. વિસ્તારની રેકી કરી કોઇ ગુનો કરવાની ફિરાકમાં હોય તેમ જણાઇ રહ્યું છે. ગામમાં તસ્કરો ફરી રહ્યાં હોવાની વાત પ્રસરતા ગામલોકોમાં ભય ફેલાયો છે. જોકે, ગામલોકો સીસીટીવી સામે આવ્યા બાદ સતર્ક થઇ ગયા છે.

વડોદરા શહેર જિલ્લામાં અવારનવાર ચોરીની ઘટનાઓ સામે આવતી રહે છે. રાત્રિના સમયે પોલીસ પેટ્રોલિંગના દાવાઓ જૂઠા પડતા જોવા મળે છે. ત્યારે આવું જ કંઇક વડોદરા તાલુકા પોલીસ મથકની હદમાં આવતા ભીમપુરા અને શેરખી ગામમાં થયું હોવાનું સામે આવ્યું છે. તાજેતરમાં ભીમપુરા અને શેરખી ગામમાં રાત્રિના સમયના એક સીસીટીવી ફૂટેજ વાઇરલ થયા છે. સીસીટીવીમાં જોવા મળ્યા અનુસાર, સવારના 5 વાગ્યાના અરસાના આ સીસીટીવી ફૂટેજીસ છે.

સીસીટીવીમાં ત્રણ સવારી બુકાનીધારી અજાણ્યા શખ્સો વિસ્તારમાં ફરી રહ્યા છે અને રીતસરની રેકી કરી રહ્યા છે. એક સમયે બાઇક પરથી એક શખ્સ ઉતરીને ઘર નજીક જાય છે અને બીજો શખ્સ તેની પાછળની બાજુ પહેરો ભરે છે. જ્યારે અન્ય એક શખ્સ બાઇક પર જ બેઠેલો જોવા મળે છે. ઘર નજીક કંઇક જોઇને શખ્સ પરત ફરે છે. ત્યારબાદ ત્રણેય શખ્સ જે રસ્તેથી બાઇક પર આવ્યા હતા, તે જ રસ્તે પરત જતા જોવા મળે છે. તસ્કરોને આટલા બેખોફ રીતે વિસ્તારમાં આંટાફેરા મારતા જોઇને લોકોમાં ગભરાટ ફેલાયો છે. જોકે, પોલીસ એલર્ટ થાય કે ન થાય ગામલોકો એલર્ટ થઈ ગયા છે.