- નામચીન બિલ્ડર સફી ફુટવાલા અને ભાણીયાએ ઝપાઝપી કરી વેપારીને માર માર્યો, જાનથી મારી નાખવાની ધમકી આપતા જે.પી. રોડ પોલીસ સ્ટેશનમાં ફરિયાદ

વડોદરાના તાંદલજા વિસ્તારમાં રહેતા ઇંટના વેપારી ઉપર નામચીન બિલ્ડર સફી ફુટવાલા અને ભાણીયાએ ઝપાઝપી કરીને માર માર્યો હતો અને જાનથી મારી નાખવાની ધમકી આપી હતી. આ મામલે જે.પી. રોડ પોલીસ સ્ટેશનમાં ફરિયાદ નોંધાઈ છે.

વડોદરાના તાંદલજા વિસ્તારમાં આવેલા મીરાન રેસિડેન્સીમાં રહેતા આકીલખાન ઈરફાનખાન (ઉ.39)એ જે. પી. રોડ પોલીસ સ્ટેશનમાં નોંધાવેલી ફરિયાદમાં જણાવ્યું છે કે, 26 ફેબ્રુઆરીના રોજ સાંજના 8 વાગ્યાની આસપાસ હું મારા ઘરેથી બહાર નીકળી ફ્લેટની નીચે જવા માટે લિફ્ટના દરવાજા પાસે જઈ લિફ્ટ ઉપર લાવવા માટે લિફ્ટનું બટન દબાવતો હતો અને વારંવાર લિફ્ટનું બટન દબાવવા છતાં લિફ્ટ ઉપર આવી નહોતી. જેથી હું પગથીયા ઊતરીને નીચે ગયો હતો.

આ દરમિયાન ત્યાં છઠ્ઠા માળે રહેતો સુહેલ શેખ નીચે લિફ્ટનું બટન વારંવાર દબાવી લિફ્ટને ઉપરના માળ સુધી આવવા માટે રોકતો હતો, જેથી તેને લિફ્ટનું બટન નહીં દબાવવા બાબતે કહેતા તે એકદમ ઉશ્કેરાઈ ગયો હતો અને મારી તરફ આવી મને ગંદી ગાળો બોલવા લાગ્યો હતો અને મેં ગાળો બોલવાની ના પાડતા તે એકદમ મારી તરફ આવી ગયો હતો અને મારી સાથે ઝપાઝપી કરવા લાગ્યો હતો અને બુમાબુમ કરીને તેને તેના મામા સફી ફુટવાલાને બોલાવ્યો હતો અને સફી ફુટવાલા આવી ગયો હતો. તે બન્નેએ મારી સાથે ઝપાઝપી કરી હતી અને તે ઝપાઝપી વખતે સફી ફુટવાલાએ મને મોઢા ઉપર જોરથી મુક્કો માર્યો હતો. જેથી મને મોઢાના ભાગે ઇજા થઈ હતી. આ સમયે ફ્લેટના માણસો ભેગા થઈ જતા બંને ત્યાંથી જતા રહ્યા હતા અને જતી વખતે સુહેલ શેખે મને કહ્યું હતું કે, અગર ફિરસે મિલેગા તો તુજે જાન સે માર દુંગા. હું ઇજાગ્રસ્ત હોવાથી મને સયાજી હોસ્પિટલમાં ખસેડવામાં આવ્યો છે. મેં આ મામલે સફી ફુટવાલા અને સુહેલ શેખ સામે જે.પી. રોડ પોલીસ સ્ટેશનમાં ફરિયાદ નોંધાવી છે.