- એક્ટિવા રેલવે સ્ટેશનથી મળી આવતા પોલીસે સીસીટીવી ચેક કર્યા
- છાયાપુરી રેલવે સ્ટેશનથી 11.54 કલાકે ટિકિટ લઇ પશ્ચિમ એક્સપ્રેસમાં બોમ્બે જતી ટ્રેનમાં બેસતા જોવા મળ્યો!
ગત રોજ ગુજરાત માધ્યમિક અને ઉચ્ચત્તર માધ્યમિક શિક્ષણ બોર્ડ દ્વારા ધોરણ 12 સામાન્ય સને વિજ્ઞાન પ્રવાહનું પરિણામ જાહેર કરવામાં આવ્યું હતું. ત્યારે શહેરના મકરપુરા વિસ્તારમાં રહેતા અને ધોરણ 12 સાયન્સમાં નાપાસ થતાં યુવકે ઘર છોડી ચાલ્યો ગયો હોવાનું સામે આવ્યું છે. આ બનાવવામાં યુવક ક્લાસમાં જવાનું કહી ઘરેથી નીકળ્યો હતો અને ત્યારબાદ તે પરત ન ફરતા પરિવારજનોએ તપાસ કરી હતી. ત્યારે તે રેલવે સ્ટેશન પોતાની એક્ટિવા મૂકી ટ્રેનમાં બેસી ગયો હોવાનું હાલમાં જાણવા મળ્યું છે.
પ્રાપ્ત વિગત અનુસાર વડોદરા શહેરના મકરપુરા વિસ્તારમાં આવેલ સોના પાર્ક સોસાયટીમાં રહેતા યકીન રાય જેઓ મકરપુરા સ્વામિનારાયણ મંદિરમાં સેવા આપે છે. તેઓનો એકનો એક પુત્ર અમન રાય (ઉં.વ.19) ગતરોજ આવેલા ધોરણ 12 સાયન્સના પરિણામમાં બે વિષયમાં નાપાસ થતા અચાનક તે ઘરેથી ટ્યુશન ક્લાસમાં જવાનું કહી નીકળી ગયો હતો. બાદમાં ઘરે પરત ન ફરતા પરિવારજનો ચિંતામાં મૂકાયા હતા અને આ બાબતની જાણ પોલીસને કરી હતી.
જો કે, આ અંગે પરિવારજનોએ સંબંધીઓને ફોન કરતા હાલ સુધીમાં કોઈપણ જગ્યાએ મળી આવ્યો નથી. અમન રાય મકરપુરા જય અંબે સ્કૂલમાં અભ્યાસ કરતો હતો અને ધોરણ 12 સાયન્સમાં બે વિષયમાં નાપાસ થતાં પોતે ઘર છોડીને ચાલ્યો ગયો છે. આ અંગે પરિવારજને જણાવ્યું હતું કે, તે 11.30 વાગ્યે ઘરેથી ક્લાસમાં જવાનું કહીને નીકળ્યો હતો. ત્યારબાદ તે પરત ન ફરતા અમે તપાસ કરી હતી. ત્યારબાદ પોલીસને જાણ કરી અને તેનું એક્ટિવા રેલવે સ્ટેશનથી મળી આવતા રેલવે સ્ટેશનના સીસીટીવી ચેક કર્યા હતા.
વધુમાં કહ્યું કે, સીસીટીવી ચેક કરતા વલસાડ તરફ ગયો હોવાની પ્રાથમિક માહિતી મળી હતી. બાદમાં પરિવારજનો હાલમાં તેની શોધખોળ કરી રહ્યા છે અને આ યુવકનું નામ અમન રાય છે. જે લાંબી બાયની વ્હાઈટ ટીશર્ટ પહેરી છે અને નીચે બ્લ્યુ જીન્સ પહેર્યું છે. સાથે જ પોતાના ખભે નાની બેગ લટકાવેલ છે. પરિવારજનોએ પણ અપીલ કરી છે કે, જો યુવક કોઈને નજરે પડે તો આ મોબાઈલ નંબર 9998977804 પર સંપર્ક કરી મદદ કરવા આજીજી કરી છે અને યુવકને પરત લાવવા માટે માતા-પિતા ખૂબ જ પ્રયાસ કરી રહ્યા છે.
આ અંગે મકરપુરા પોલીસ મથકના પી.આઇ જે.એન.પરમાર સાથે ટેલિફોનિક વાતચીત કરતા તેઓએ જણાવ્યું હતું કે, આ અંગે અમને માહિતી મળી છે. અમે શોધખોળ શરૂ કરી છે, આ યુવક છાયાપુરી રેલવે સ્ટેશનથી 11.54 કલાકે ટિકિટ લેતો નજરે પડે છે અને પશ્ચિમ એક્સપ્રેસમાં બોમ્બે તરફ જતી ટ્રેનમાં બેઠો છે. આ અંગે અમને માહિતી મળી છે અને શોધખોળ ચાલી રહી છે.
