- વોટ્સઅપ પર વીડિયો કોલ કરી વૃદ્ધને કહ્યું, હું મુંબઈ ક્રાઇમ બ્રાંચમાંથી બોલું છું, 287 કરોડના મની લોન્ડરિંગના કેસમાં સામેલ છો, હું તમને ડિજિટલ એરેસ્ટ કરું છું
`હું આનંદ રાણા મુંબઈ ક્રાઈમ બ્રાંચમાંથી બોલું છું. તમે પોર્નોગ્રાફીનો ધંધો કરો છો, તમે 287 કરોડ રૂપિયાના મની લોન્ડરિંગના કેસમાં સામેલ છો. હું તમને ડિજિટલ અરેસ્ટ કરું છું અને તમે બહાર કોઈને જાણ કરશો તો તમારી જાનને ખતરો છે' એમ કહીને સાયબર માફિયાઓએ 72 વર્ષીય વૃદ્ધને 45 દિવસ સુધી ડિજિટલ અરેસ્ટ રાખીને 1.60 કરોડ ખંખેર્યા હતા. આ કિસ્સામાં ભોગ બનનારે માત્ર ફોન કોલ દરમિયાન 1 નંબર દબાવ્યો ને આખો ખેલ શરૂ થયો હતો.
મૂળ મુંબઈના અને વડોદરામાં રહેતા વડોદરા શહેરમાં રહેતા 72 વર્ષીય નિવૃત્ત સિનિયર સિટિઝને વડોદરા સાયબર ક્રાઇમ પોલીસ સ્ટેશનમાં નોંધાવેલી ફરિયાદમાં જણાવ્યું છે કે ગત 15 સપ્ટેમ્બરના રોજ હું મારા ઘરે હતો. એ દરમિયાન મને અજાણ્યા મોબાઇલ નંબરથી ફોન આવ્યો હતો અને તે ફોન TRAIમાંથી બોલું છું, એમ જણાવ્યું હતું. એમાં કેસેટ બોલતી હતી કે તમે રાષ્ટ્રવિરોધી કોઈ કામ ન કર્યું હોય તો 1 દબાવો, જેથી મેં 1 દબાવ્યું હતું.
ત્યાર બાદ મને જણાવ્યું હતું કે તમારી સામે મુંબઈના'અંધેરી-વેસ્ટના ગણેશનગરથી ફરિયાદ થઈ છે અને તમે પોર્નોગ્રાફીનો ધંધો કરો છો, જેથી મેં કહ્યું હતું કે હું આવો કોઈ ધંધો કરતો નથી. તો મને તેમણે કહ્યું હતું કે તમે મુંબઈ ક્રાઈમ બ્રાંચમાં જઈને અરજી કરો, પરંતુ મેં તેને કહ્યું હતું કે હું ચાલી શકતો નથી. તો તેમણે મને કહ્યું હતું કે હું તમારો ફોન મુંબઈ ક્રાઈમ બ્રાંચમાં કનેક્ટ કરાવું છું. બાદમાં મારો ફોન બીજા કોઇ અજાણ્યા મોબાઈલ નંબર સાથે કનેક્ટ કર્યો હતો અને પછી અચાનક વીડિયો કોલ ચાલુ થઈ ગયો હતો.
આ સમયે સામેવાળો મને જોઇ શકતો હતો, પરંતુ હું તેને જોઈ શકતો નહોતો. તેણે મને કહ્યું હતું કે હું આનંદ રાણા, મુંબઈ ક્રાઈમ બ્રાંચમાંથી બોલુ છું. તમે 287 કરોડ રૂપિયાના મની લોન્ડરિંગના કેસમાં સામેલ છો અને હું તમને ડિજિટલ એરેસ્ટ કરું છું. જો તમે બહાર કોઈને જાણ કરશો તો તમારી જાનને ખતરો છે, એમ કહી મને ડરાવવા લાગ્યો હતો. મારી પાસે મારાં તમામ બેંક ખાતાંની માહિતી માગી હતી, જેથી મેં મારાં બેંક ખાતાંઓની માહિતી આપી હતી, સાથે મને વ્હોટ્સએપ મારફત અરેસ્ટ વોરંટ પણ મોકલ્યું હતું. ત્યાર બાદ મને 18 સપ્ટેમ્બરના રોજ તેમના વ્હોટ્સએપ પરથી એક સુપ્રીમ કોર્ટનો લેટર મોકલ્યો હતો. એમાં જણાવ્યું હતું કે MD ISLAM NAWAB MALIK GROUPના મની લોન્ડરિંગના કેસમાં તમારું નામ ખૂલ્યું છે, જેથી તમે નીચેની શરતો પૈકી કોઈપણ શરતોનું પાલન નહીં કરો તો ત્રણથી સાત વર્ષની જેલ થઈ શકે છે, જેથી હું ખૂબ જ ડરી ગયો હતો. તેમણે મને જણાવ્યું હતું કે હું તમારી મદદ કરીશ અને તમને હું એક દિલ્હીના સારા વકીલ રાકેશ સાથે વાત કરાવું છું. તેઓ કહે એ રીતે તમે કરો અને મારો ફોન રાકેશ સાથે કનેક્ટ કરી વાત કરાવી હતી.
રાકેશે મને કહ્યું હતું કે તમારી બેંકમાં પડેલા કેસ રૂપિયાનું વેરિફિકેશન કરવું પડશે અને તમારા ભરેલા તમામ રૂપિયા તમને પરત આપવામાં આવશે. તમે તમારી તમામ FD વિડ્રોઅલ કરો, એમ કહેતાં હું મારી બેંકોમાં ગયો હતો અને મારી તમામ એફડી વિડ્રો કરી હતી. ત્યાર બાદ તેમના કહેવા પ્રમાણે તેમના એકાઉન્ટમાં રૂપિયા નાખ્યા હતા, ત્યાર બાદ તેમણે મારા તમામ બેંક એકાઉન્ટના રૂપિયા તેમના એકાઉન્ટમાં ટ્રાન્સફર કરવા માટે કહ્યું હતું. જેથી મેં તમામ એકાઉન્ટના રૂપિયા તેમના એકાઉન્ટમાં ટ્રાન્સફર કર્યા હતા.
ત્યાર બાદ મારા ડિમેટ એકાઉન્ટના શેર વેચવા માટે મને કહ્યું હતું, જેથી મેં શેર વેચીને તેમના એકાઉન્ટમાં રૂપિયા નાખ્યા હતા. આમ, તેમણે મારી પાસેથી 1.60 કરોડ રૂપિયા ખંખેરી લીધા હતા. ત્યાર બાદ મેં વીડિયો કોલ કાપી નાખ્યો હતો. જોકે તેમણે ફરીથી વીડિયો કોલ કરવા માટે મને કહ્યું હતું, પરંતુ મને શંકા જતાં મેં કોલ કર્યો નહોતો. મારા રૂપિયા પરત માગવા મેં તેમને રોજ-રોજ ફોન કરું છું, પરંતુ તેઓ ફોન ઉપાડતા નથી, જેથી મેં આ મામલે સાયબર ક્રાઇમ પોલીસ સ્ટેશનમાં ફરિયાદ નોંધાવી છે.
