- ડેપ્યુટી મ્યુનિ. કમિશનર અર્પિત સાગરે વિવિધ કંપનીઓ અને સંસ્થાઓ પાસેથી ચાર્જિંગ સ્ટેશન બનાવવા એક્સપ્રેશન ઓફ ઇન્ટરેસ્ટ મંગાવ્યા

કેન્દ્ર સરકારની ઈલેક્ટ્રીક વ્હિકલ પ્રોત્સાહન યોજના અંતર્ગત વડોદરામાં 100થી વધુ ઈલેક્ટ્રીક બસ દોડાવવાનું આયોજન હાથ ધરવામાં આવ્યું છે. જેની સાથે સાથે ખાનગી ઈલેક્ટ્રીક વાહનો પણ ઉત્તરોત્તર વધી રહ્યા છે ત્યારે વડોદરા કોર્પોરેશન દ્વારા વિવિધ વિસ્તારમાં પબ્લિક ઇલેક્ટ્રીક વ્હિકલ ચાર્જિંગ સ્ટેશન શરૂ કરવા માટે ડેપ્યુટી મ્યુનિસિપલ કમિશનરે કંપનીઓ અને સંસ્થાઓ પાસેથી એક્સપ્રેસન ઓફ ઇન્ટરેસ્ટ મંગાવવામાં આવ્યા છે.

વડોદરા મ્યુનિસિપલ કોર્પોરેશન દ્વારા હાલમાં ચાલતી વિનાયક શહેરી બસ સુવિધામાં હવે 100થી વધુ ઈલેક્ટ્રીક બસ દોડાવવાનું આયોજન હાથ ધરવામાં આવનાર છે, ત્યારે હવે કેન્દ્ર સરકારની ઈલેક્ટ્રીક વ્હિકલ પ્રોત્સાહન યોજના અંતર્ગત કેન્દ્ર સરકાર વડોદરા કોર્પોરેશનને સહાય કરનાર છે. સાથે સાથે વડોદરા શહેરમાં ખાનગી ઇલેક્ટ્રિકલ વ્હિકલમાં પણ ઉતરોતર વધારો થઈ રહ્યો છે જેને ધ્યાનમાં રાખી વડોદરા મ્યુનિસિપલ કોર્પોરેશનના કમિશનર દિલીપ રાણાએ આગોતરું આયોજન હાથ ધર્યું છે જેને ધ્યાનમાં રાખી ડેપ્યુટી મ્યુનિસિપલ કમિશનર અર્પિત સાગરે વિવિધ કંપનીઓ અને સંસ્થાઓ પાસેથી ઈલેક્ટ્રીક વાહનો માટે 38 સ્થળોએ પબ્લિક ઇલેક્ટ્રિકલ ચાર્જિંગ સ્ટેશન બનાવવા એક્સપ્રેશન ઓફ ઇન્ટરેસ્ટ મંગાવવામાં આવ્યા છે.

કોર્પોરેશનના ડેપ્યુટી કમિશનર અર્પિત સાગરે આપેલી જાહેરાતમાં જણાવ્યું છે કે, વડોદરા શહેરના વિવિધ વિસ્તારોમાં પબ્લિક ઈલેક્ટ્રીક વ્હીકલ ચાર્જિંગ સ્ટેશન બનાવવાના છે તે માટે રસ ધરાવતી કંપનીઓ, ડેવલોપર અને ઓર્ગેનાઇઝેશન પાસેથી પબ્લિક પ્રાઇવેટ પાર્ટનરશીપના અભિગમ મુજબ એક્સપ્રેશન ઓફ ઇન્ટરેસ્ટ મંગાવવામાં આવે છે. જેમાં 10 વર્ષ માટેનું ઓપરેશન એન્ડ મેન્ટેનન્સની પણ જવાબદારી સોંપવામાં આવનાર છે. આ માટે રજીસ્ટર એડી કે સ્પીડ પોસ્ટથી એક્સપ્રેશન ઓફ ઇન્ટરેસ્ટ એક્ઝિક્યુટિવ એન્જિનિયર સ્ટ્રીટ લાઈટ વિભાગને તા.7 નવેમ્બર સુધીમાં મોકલવાના રહેશે.