- સ્થાનિકો વધુ એક વખત ધારાસભ્યને સાથે રાખી પાલિકાની કચેરીએ પહોંચ્યા હતા, આર્કિટેક્ટે કહ્યું, સમસ્યા હળવી થવાની જગ્યાએ તેમની મુશ્કેલીમાં વધારો થશે

શહેરના વાસણા રોડ ડિ-માર્ટ જંક્શન પર બનનાર ફ્લાયઓવર બ્રિજના વિરોધમાં સ્થાનિકો છેક સુધી લડી લેવા માટે હજુ પણ મક્કમ છે. સ્થળ ઉપર વિરોધ પ્રદર્શન કર્યા બાદ પોસ્ટર વોર પણ ફાટી નીકળ્યું હતું. છતાં પાલિકા બ્રિજ બનાવવા માટે મક્કમ છે, તો બીજી તરફ સ્થાનિકો વધુ એક વખત ધારાસભ્યને સાથે રાખીને પાલિકાની કચેરીએ પહોંચ્યા હતા અને સિટી એન્જિનિયરને બ્રિજ ન બનાવવા રજૂઆત કરી હતી.

ધારાસભ્ય ચૈતન્ય દેસાઇએ જણાવ્યું કે, એક મહિના પહેલા અમે વાસણા ફ્લાયઓવર બ્રિજને લઇને મ્યુનિસિપલ કમિશનરને મળવા આવ્યા હતા. સ્થાનિકોને જે પ્રશ્નો હતા તેના ઉકેલ માટે મળ્યા હતા. આજે પણ એક મહિલા એન્જિનિયરને સાથે રાખી સીટી એન્જિનિયર અલ્પેશ મજમુદારને રજૂઆત કરવામાં આવી છે. એન્જિનિયરે અધિકારી સાથે ટેકનિકલ રજૂઆત કરી છે. સમાધાન લાવવા માટે પ્રયાસો કરી રહ્યા છે. સ્થાનિકોનો વિરોધ છે કે, બ્રિજ ન થવો જોઇએ અને સરકારનું કહેવું છે કે, બ્રિજ બનવો જોઇએ. સરકાર પણ જાણી, સમજીને નિર્ણય પર આવ્યા હશે, એટલે બંને તરફે એક સમજુતી થાય. સિટી એન્જિનિયરે નાગરિકોની વાત સાંભળી છે.

આર્કિટેક્ટ જ્યોતિ ગીલે જણાવ્યું હતું કે, તેમનું કહેવું છે કે, આ રોડ 24 મીટરનો છે, તો હાલની સ્થિતીએ 24 મીટરના રોડ પર બ્રિજ બનાવવો યોગ્ય નથી. કારણકે નીચે સર્વિસ અને પાર્કિંગની જગ્યા નહીં મળે. જે સંકળામણ વધારશે, સ્થાનિક લોકો માટે સમસ્યા હળવી થવાની જગ્યાએ તેમની મુશ્કેલીમાં વધારો થશે. સાથે જ અવર-જવર કરતા લોકો માટે પણ મુશ્કેલી સર્જાશે. અર્બન પ્લાનીંગની વાત કરીએ તો મોટા પ્રમાણમાં સારાઇ (લાર્જર ગુડ) જોવામાં આવે છે. તે હિસાબથી યોગ્ય ટ્રાફિક અવજ-જવર અનુસાર જ બ્રિજ બનાવાય છે, જે અહિંયા નથી. ભવિષ્યમાં પણ શક્યતાઓ ઓછી છે. જે જરૂરિયાતને આગળ ધરીને તેઓ આ બ્રિજ બનાવી રહ્યા છે તે આજની સ્થિતિએ નથી. લોકો પાસે જવા માટે વૈકલ્પિક રસ્તાઓ હોવાના કારણે અહિંયા ટ્રાફિકની સમસ્યા નહીં સર્જાય.