- સ્ટેટ મોનિટરિંગ સેલે ભારતીય બનાવટનો વિદેશી દારૂની 10,258 બોટલ કિંમત 25.83 લાખ, રોકડા, મોબાઇલ અને ટેમ્પો મળી 39,31 લાખનો મુદ્દામાલ જપ્ત કર્યો
વડોદરા ગ્રામ્યમાં આવતા ચાણોદમાં સ્ટેટ મોનીટરીંગ સેલ દ્વારા દરોડા પાડવામાં આવ્યો હતો. આ દરોડામાં રૂ. 25.83 લાખનો વિદેશી દારૂ ઝડપી પાડવામાં આવ્યો છે. તિલકવાડાથી વિદેશી દારૂનો જંગી જથ્થો ભરીને ટેમ્પો વડોદરા તરફ જઇ રહ્યો હતો. દરમિયાન વચ્ચે સ્ટેટ મોનીટરીંસ સેલની ટીમ દ્વારા સફળ રેડ કરવામાં આવી છે. આ કાર્યવાહીમાં એકની ઘરપકડ કરવામાં આવી છે. જ્યારે ફરાર ત્રણને વોન્ટેડ જાહેર કરવામાં આવ્યા છે. ઉલ્લેખનીય છે કે, વિતેલા એક મહિનામાં અનેક વખત સ્ટેટ મોનીટરીંગ સેલની ટીમો વડોદરા શહેર-જિલ્લામાં પ્રોહીબીશનની સફળ રેડ કરી ચુકી છે.
સ્ટેટ મોનિટરિંગ સેલના પીઆઇ એચ. વી. તડવીને વડોદરા ગ્રામ્યમાં વિદેશી દારૂ લઇ જવા અંગે ચોક્કસ બાતમી મળી હતી. જેને પગલે રેડ કરવામાં આવી હતી. વડોદરા જિલ્લાના ચાણોદ પોલીસ સ્ટેશન હદ વિસ્તારમાં બાતમીના આધાર તિલકવાડાથી ડભોઇ-વડોદરા જતા રોડ પર આવેલા સિમેન્ટના ગોડાઉનની સામે ચાણોદમાં ટીમ વોચમાં હતી. તે દરમિયાન જિલ્લાના સોમપુરગામ પાસે અને ચાણોદ પોલીસ સ્ટેશન હદ વિસ્તારમાંથી પસાર થતાં શંકાસ્પદ ટેમ્પો મળી આવતા તેને રોકવામાં આવ્યો હતો. બાદમાં ટેમ્પામાં રાખેલા મુદ્દામાલની તપાસ કરવામાં આવી હતી. તપાસ દરમિયાન તેમાંથી ભારતીય બનાવટનો વિદેશી દારૂનો જથ્થો રૂપિયા 25 લાખથી વધુનો મળી આવ્યો હતો જે અંગે ચાણોદ પોલીસ મથકમાં વઘુ કાર્યવાહી હાથ ધરવામાં આવી છે. આ સાથે જ ટેમ્પોના ચાલક અજીતકુમાર હરિદય નારાયણ સિંઘ (મૂળ રહે. સારાય લોકા, બુરહાનપુર, જૌનપુર, યુ.પી.) (હાલ રહે. અંજલિ ધારા રેસીડેન્સી A-8, મીરા નગર પાસે સારંગપુર, તા. અંકલેશ્વર, ભરૂચ) ની અટકાયત કરવામાં આવી છે.
સ્ટેટ મોનિટરિંગ સેલ દ્વારા કરવામાં આવેલી કાર્યવાહીમાં ભારતીય બનાવટના વિદેશી દારૂની 10,258 બોટલ જેની કિંમત રુપિયા 25,83,062, રોકડા, મોબાઇલ અને ટેમ્પો મળી કુલ રૂપિયા 39,31,382ના મુદામાલ સાથે ડ્રાઇવર ઈસમની ધરપકડ કરી છે જ્યારે દારૂનો જથ્થો મોકલનાર સુરેશભાઇ પટેલ, ટેમ્પા માલિક તથા દારૂનો જથ્થો મંગાવનારને વોન્ટેડ જાહેર કરવામાં આવ્યા છે. આ મામલે ચાણોદ પોલીસે વધુ કાર્યવાહી હાથ ધરી છે.
ઉલ્લેખનીય છે કે, સ્ટેટ મોનીટરીંગ સેલના દરોડાને પગલે સ્થાનિક પોલીસ વધુ એક વખત ઉંઘતી ઝડપાઇ હોવાનું મનાઇ રહ્યું છે. વિતેલા એક માસમાં અનેક વખત વડોદરા શહેર અને ગ્રામ્યમાં સ્ટેટ મોનીટરીંગ સેલની ટીમો દ્વારા દરોડા પાડવામાં આવ્યા છે. એક પછી એક કાર્યવાહીને પગલે બુટલેગરોમાં ભારે ફફડાટ જોવા મળી રહ્યો છે.
