વડોદરાના ન્યુ અલકાપુરી વિસ્તારમાંથી ધોળે દિવસે કાર ચોરનાર નડિયાદના શખ્સને પોલીસે ઝડપી પાડયો છે.
આજવા રોડ વિસ્તારમાં અમરદીપ હોમ્સ ખાતે રહેતા અને આનંદ નજીક પ્રાથમિક સ્કૂલમાં શિક્ષક તરીકે ફરજ બજાવતા જયેશભાઈ પટેલે પોલીસને કહ્યું છે કે, ગઇ તા. 12મી બપોરે હું ન્યુ અલકાપુરી વિસ્તારમાં મારા મિત્રને મળવા ગયો હતો તે દરમિયાન મારી કાર ચોરાઈ ગઈ હતી. બનાવ અંગે શિક્ષકે લક્ષ્મીપુરા પોલીસ સ્ટેશનમાં ફરિયાદ નોંધાવતા પોલીસે સીસીટીવી ફૂટેજના આધારે જતીન મહેન્દ્રભાઈ પટેલ (શ્રીજી સોસાયટી, ઉત્તરસંડા, નડિયાદ)ને ઝડપી પાડી કાર કબજે કરી છે. પોલીસે જતીન પટેલની વધુ પૂછપરછ હાથ ધરી છે.
