વડોદરાના સયાજીગંજ વિસ્તારમાં આવેલા કમાટીબાગના ગેટ નંબર બે પાસેથી પોલીસે લોખંડની સ્ટીક સાથે એક શખ્સને ઝડપી પાડ્યો હતો. તેની સામે પોલીસના હથિયારબંધીના જાહેરનામા ભંગનો ગુનો દાખલ કરી આગળની કાર્યવાહી હાથ ધરી છે.
સયાજીગંજ પોલીસ સ્ટેશનનો સ્ટાફ ગઈકાલે વિસ્તારમાં પેટ્રોલિંગ કરી રહ્યો હતો તે દરમિયાન બાતમી મળી હતી કે, કમાટીબાગના ગેટ નંબર બે પાસે એક શખ્સ લોખંડની સ્ટીક લઇને ઉભો છે. જેના આધારે સયાજીગંજ પોલીસે બાતમી મુજબના સ્થળ પર પહોંચી લોખંડની સ્ટીક સાથે ઉભેલા શાહરૂખ ઉર્ફે નટો ઈસ્માઈલખાન પઠાણ (રહે. હાથી ખાના, ઝુંપડપટ્ટી)ને ઝડપી પાડ્યો હતો. પોલીસે તેની પાસેથી આ લોખંડની સ્ટીક કબ્જે કરી સામે પોલીસ કમિશનરના હથિયારબંધીના જાહેરનામા ભંગનો ગુનો દાખલ કર્યો છે. શાહરૂખ કયા કારણોસર લોખંડની સ્ટીક પોતાની સાથે લઈને ફરતો હતો તે દિશામાં પૂછપરછ હાથ ધરી છે.
