- પોક્સો કોર્ટે આરોપીને 20 વર્ષની સખત કેદની સજા અને 50 હજારનો દંડ ફટકાર્યો
વડોદરા જિલ્લાના સાવલી પોલીસ મથકની હદમાં 2020ની સાલમાં સગીરા સાથે દુષ્કર્મ આચરનાર આરોપીને સાવલીની પોક્સો કોર્ટે તકસીરવાર ઠેરવીને 20 વર્ષની સખત કેદની સજા અને રૂપિયા 50 હજારનો દંડ ફટકાર્યો છે. આરોપી દંડ ન ભરે તો વધુ 6 માસની સજાનો હુકમ કર્યો છે. કોર્ટે વર્ષના અંતિમ દિવસે ચુકાદો આપ્યો હતો.
સાવલી પોલીસ મથકે 2020ની સાલમાં પોતાના મામાના ઘરે રહેતી 17 વર્ષીય સગીરાને તેની પાડોશમાં રહેતો કરણ છગનભાઈ નાયકે સગીરાની મરજી વિરુદ્ધ પટાવી ફોસલાવી પ્રેમજાળમાં ફસાવીને અપહરણ કરીને વિવિધ જગ્યાએ લઈ જઈ દુષ્કર્મ આચર્યું હતું.
આ બનાવની સાવલી પોલીસ મથકે ફરિયાદ નોંધાઈ હતી. પોલીસે આરોપીને ઝડપીને જેલ ભેગો કર્યો હતો. જે કેસ સાવલીની અધિક પોક્સો કોર્ટના જજ જે.એ. ઠક્કરની કોર્ટર્માં ચાલી જતા સરકારી વકીલ સી.જી.પટેલની ધારદાર દલીલોને ગ્રાહ્ય રાખીને આરોપીને તકસીરવાર ઠેરવીને 20 વર્ષની સખત કેદની સજા અને રૂપિયા 50,000નો દંડ ફટકાર્યો હતો. જ્યારે અપહરણ સહિતની અન્ય કલમોમાં 8 વર્ષની સજા અને રૂપિયા 8000નો દંડ ફટકાર્યો હતો.
કોર્ટે નોંધ્યું હતું કે, આરોપી પોતે પરિણીત હોવા છતાંય સગીરા સાથે દુષ્કર્મ આચર્યું હતું. તે સાથે જિલ્લા લીગલ ઓથોરિટીને વિકટીમ કોમ્પનશેસન સ્કીમ હેઠળ રૂપિયા 4 લાખનું વળતર પીડિતાના પરિવારને ચૂકવી આપવા જિલ્લા લીગલ ઓથોરિટીને ભલામણ કરી છે. તેમજ આરોપી જો દંડ ભરે તે રકમ પણ પીડિતાને ચૂકવી દેવા ભલામણ કરી છે.