- પોલીસે બંને સ્થળ પરથી વિદેશી દારૂની ૪૯૯ બોટલ કબજે કરી

વડોદરાના નવાપુરા અને વાઘોડિયા રોડ પર વિદેશી દારૂનો ધંધો કરતા બે આરોપીઓને પીસીબી પોલીસે ઝડપી પાડી સવા લાખનો વિદેશી દારૂનો જથ્થો કબજે કર્યો છે.

નવાપુરા કેવડાબાગની બાજુમાં આવેલ કેદારનાથ રેસિડેન્સીમાં ચોથા માળે રહેતો નયન રાકેશભાઇ કહાર પોતાના ઘરે વિદેશી દારૂ લાવીને વેચાણ કરતો હોવાની માહિતી પીસીબી પોલીસને મળી હતી. જેથી,  પી.આઇ. સી.બી.ટંડેલની સૂચના મુજબ, સ્ટાફે ઉપરોક્ત સ્થળે જઇને  રેડ કરતા નયન કહાર મળી આવ્યો હતો. પોલીસે તેના ઘરેથી વિદેશી દારૂની ૨૦૪ બોટલ કિંમત રૂપિયા ૮૧,૬૦૦ ની કબજે કરી છે. મોબાઇલ ફોન સહિત પોલીસે ૧.૦૬ લાખનો મુદ્દામાલ કબજે  કર્યો છે.

જ્યારે અન્ય એક બનાવમાં પીસીબીને માહિતી મળી હતી કે, જૂના બાપોદ જકાતનાકા જય અંબે નગરની સામે માજીબા નગરમાં રહેતો અશોક ઉદયલાલ ખટીક વિદેશી દારૂનો ધંધો કરે છે. જેથી, પોલીસે ઉપરોક્ત સ્થળે જઇને રેડ કરતા અશોક ખટીક ઝડપાઇ  ગયો હતો. તેની સામે બે વર્ષ અગાઉ બાપોદમાં બે ગુના નોંધાયા હતા. પોલીસે દારૂની ૨૯૫ બોટલ કિંમત રૂપિયા ૪૫,૬૦૦ તથા મોબાઇલ ફોન મળીને કુલ  રૂપિયા ૫૫,૬૦૦ નો મુદ્દામાલ કબજે કર્યો છે.