આજે વિષ્ણુ ભગવાનના છઠ્ઠા અવતાર સમા શ્રી પરશુરામ ભગવાનની જન્મ જયંતિ નિમિત્તે શહેરભરમાં વિવિધ ધાર્મિક કાર્યક્રમોનું આયોજન કરવામાં આવ્યું છે. અખાત્રીજ અને પરશુરામ જન્મ જયંતિ નિમિત્તે આર્યવ્રત બ્રહ્મ સમાજ દ્વારા નિઝામપુરા ખાતેથી ભગવાનની મહારેલીનું આયોજન કર્યું હતું. જેનું ભારે આકર્ષણ રહ્યું હતું. આ મહારેલીની પરશુરામ મંદિરે જઈને મહાઆરતી બાદ પૂર્ણાહુતિ કરવામાં આવી હતી. શહેરમાં છેલ્લા 20 વર્ષથી આર્યાવ્રત બ્રહ્મસમાજ દ્વારા પ્રતિવર્ષ પરશુરામ જન્મ જયંતિ નિમિત્તે ભવ્ય રેલીનું આયોજન કરવામાં આવે છે. આવી જ રીતે આજે અખાત્રીજના દિવસે ભવ્ય આયોજન કરાયું હતું.
આ મહારેલી મહેસાણા નગરથી પ્રસ્થાન થઈ ડીલક્ષ ચાર રસ્તા, ફતેગંજ મેઇન રોડ કાલાઘોડા થઈ, રાજમહેલ રોડ થઈ કાશી વિશ્વનાથ મહાદેવ મંદિર ખાતે સંપન્ન થઈ હતી. જ્યારે રેલી કોઠીચાર રસ્તા ખાતે આવી પહોંચતા બ્રાહ્મણ સમાજના કાર્યકર્તાઓએ ફૂલોથી સ્વાગત કર્યું હતું.
રેલીમાં ભવ્ય ફ્લોટ્સના પ્રારંભે બગીઓ અને ટ્રકોમાં ખાસ બનાવેલા આકર્ષણરૂપ ભવ્ય બેઠક વ્યવસ્થામાં બાળકોએ વિવિધ વેશભૂષામાં સજ્જ થતા સનાતનની ધર્મના વિવિધ પ્રતિકૃતિથી વિવિધ ભગવાનની યાદ તાજી થઈ હતી. જેમાં બ્રહ્મસમાજ અને સનાતનીઓ મોટી સંખ્યામાં જોડાયા હતા. નિઝામપુરાથી પ્રસ્થાન થયેલી મહારેલીએ વિવિધ રાજમાર્ગો પર ભારે આકર્ષણ જમાવ્યું હતું.
શહેરના રાજ માર્ગો પર ટૂ-વ્હિલર ચાલકો અને ફોર વ્હિલર વાહનો રેલીમાં જોડાતા રેલીનું આકર્ષણ વધ્યું હતું. મહિલાઓ પણ આ મહારેલીમાં મોટી સંખ્યામાં જોડાઈ હતી. શહેરના વિસ્તારમાંથી પણ ભગવાન પરશુરામ જયંતિ નિમિત્તે રેલીઓનું આયોજન કરવામાં આવ્યું હતું. આજના શુભ દિવસે નાના મોટા વાહનોના શો રૂમમાં પણ વાહનો ખરીદવા માટે લોકો ઉમટી પડ્યા હતા.
