- પીસીબી પોલીસે 480 નંગ વિદેશી શરાબની બોટલ, એક મોબાઈલ ફોન તેમજ થ્રી વ્હીલર ટેમ્પો મળીને 1,98,500નો મુદ્દામાલ જપ્ત કર્યો

શહેરના કારેલીબાગ વિસ્તારના કુખ્યાત બુટલેગર મનોજ રામચંદ્ર કહારને થ્રી વીલર ટેમ્પોમાં રાખેલ વિદેશી શરાબના જથ્થા સાથે ઝડપી પાડીને પીસીબી શાખાએ ગુનો નોંધ્યો છે.

વડોદરા શહેરના કારેલીબાગ વિસ્તારમાં 41 જેટલા પ્રોહિબિશન તેમજ અન્ય ગુનાઓમાં સંડોવાયેલા આરોપી મનોજ રામચંદ્ર કહારને શહેર પીસીબી શાખાએ વિદેશી શરાબના જથ્થા સાથે ઝડપી પાડ્યો છે. પીસીબી શાખાની ટીમને બાતમી મળી હતી કે, પાર્વતી નગર કારેલીબાગ ખાતે રહેતો મનોજ કહાર ગ્રીન કલરના થ્રી વ્હીલર બંધ બોડીના ટેમ્પામાં ઇંગ્લિશ દારૂનો જથ્થો ભરીને મુક્તાનંદ ત્રણ રસ્તા પાસે આવેલા સુકન અનંતા કોમ્પલેક્ષના બેઝમેન્ટમાં મુકવા જઈ રહ્યો છે. જે બાતમીના આધારે પોલીસે રેડ કરતા થ્રી વ્હીલર ટેમ્પો માં રાખેલો વિદેશી શરાબનો જથ્થો મળી આવ્યો હતો. જ્યારે સ્થળ પરથી મનોજ રામચંદ્ર કહારની ધરપકડ કરવામાં આવી હતી.

પીસીબી શાખાએ સ્થળ પરથી 480 નંગ વિદેશી શરાબની બોટલો એક મોબાઈલ ફોન તેમજ થ્રી વ્હીલર ટેમ્પો મળીને 1,98,500 નો મુદ્દામાલ જપ્ત કરી, મનોજ રામચંદ્ર કહારની ધરપકડ કરીને રૂબીન ઉર્ફેક કટ્ટે નામના ઈસમને વોન્ટેડ જાહેર કર્યો છે.