- પોલીસે દારૂનો જથ્થો, મોબાઈલ ફોન તથા 3 મોપેડ સહિત 35 હજારનો મુદ્દામાલ કબજે કર્યો

વડોદરા શહેરના દાંડિયા બજાર વિસ્તારમાં આવેલ હરી ગજાનંદ એપાર્ટમેન્ટના પાર્કિંગમાં ત્રણ ટુવ્હીલરમાં દારૂનો જથ્થો રાખી વેચાણ કરતા શખ્સને પોલીસે ઝડપી પાડી રૂ.35 હજારની કિંમતનો મુદ્દામાલ કબજે કર્યો છે. જ્યારે આરોપીએ આ દારૂનો જથ્થો કોની પાસેથી મેળવ્યો તે દિશામાં વધુ તપાસ અર્થે આરોપીના રિમાન્ડની તજવીજ હાથ ધરી હોવાનું જાણવા મળ્યું છે.

વડોદરા શહેર લોકલ ક્રાઈમ બ્રાન્ચ ઝોન-2ને પોલીસ કંટ્રોલ તરફથી વર્ધી મળી હતી કે, દાંડિયા બજાર વિસ્તારમાં આવેલી રેવા હોસ્પિટલની બાજુમાં હરી ગજાનંદ એપાર્ટમેન્ટના પાર્કિંગમાં બે મોપેડમાં વિદેશી દારૂનો જથ્થો રાખી નિકુલ કહાર વેચાણ કરે છે. જેના આધારે પોલીસે બાતમી મુજબના સ્થળે દરોડો પાડી મહેશ ઉર્ફે નિકુલ રાજુભાઈ કહાર (રહે-હરિ ગજાનંદ એપાર્ટમેન્ટસ, દાંડિયા બજાર)ને ઝડપી પાડ્યો હતો. જ્યારે પાર્કિંગ એરિયામાં રહેલા ત્રણ મોપેડમાંથી રૂ.11,420ની કિંમતની દારૂની 13 નંગ બોટલો તથા ક્વોટરીયા 48 નંગ મળી આવ્યા હતા. પોલીસે દારૂનો જથ્થો, મોબાઈલ ફોન તથા ત્રણ મોપેડ સહિત કુલ રૂ. 35 હજારનો મુદ્દામાલ કબજે કરી આરોપીની પ્રોહીબિશનના ગુનામાં ધરપકડ કરી હતી.