- આરોપીએ આ દારૂનો જથ્થો તરસાલી ખાતે રહેતા મુકેશ માખીજાની પાસેથી મેળવ્યો હોવાની કબુલાત કરતા પોલીસે તેને વોન્ટેડ જાહેર કર્યો

શહેરના હરણી-વારસિયા રીંગ રોડ ખાતેની રાધાશ્યામ સોસાયટીમાં પોલીસે દરોડો પાડી મકાનમાં દારૂ-બિયરના જથ્થા સાથે એક શખ્સને ઝડપી પાડી  દારૂની બોટલો તથા બિયરના ટીન 454  મળી કુલ રૂપિયા 3,27,030નો મુદ્દામાલ કબ્જે કરી દારૂનો જથ્થો આપનાર આરોપીને વોન્ટેડ જાહેર કરી વધુ તપાસ હાથ ધરી છે.

વડોદરાના વારસિયા પોલીસને ચોક્કસ માહિતી મળી હતી કે, હરણી વારસિયા રીંગ રોડ ખાતેની રાધાશ્યામ સોસાયટીમાં રહેતા ગિરીશ ઉર્ફે ગુડ્ડુ પહેલવાણીએ પોતાના મકાનમાં વિદેશી દારૂનો જથ્થો સંતાડ્યો છે. જેના આધારે પોલીસે રાધાશ્યામ સોસાયટીમાં આવેલા મકાન નંબર 9 ખાતે દરોડો પાડી ગિરીશ લક્ષ્મણદાસ પહેલવાણીને ઝડપી પાડ્યો હતો. તેના ઘરની તલાસી લેતા બેડરૂમ તથા કિચનમાંથી ગુટકાના થેલામાં ભારતીય બનાવટનો વિદેશી દારૂનો જથ્થો મળી આવ્યો હતો. પોલીસે રૂ. 3,21,030ની કિંમતની દારૂની બોટલો તથા બિયરના ટીન કુલ નંગ 454, રોકડા રૂપિયા, મોબાઇલ ફોન સહિત કુલ રૂપિયા 3,27,030નો મુદ્દામાલ કબ્જે કરી આરોપીની પ્રોબિશનના ગુનામાં અટકાયત કરી હતી. પોલીસની પૂછતાછમાં આરોપીએ આ દારૂનો જથ્થો તરસાલી ખાતે રહેતા મુકેશ માખીજાની પાસેથી મેળવ્યો હોવાની કબુલાત કરતા પોલીસે તેને વોન્ટેડ જાહેર કર્યો છે.