- સ્કૂલ બહાર પોલીસનો બંદોબસ્ત ગોઠવી દેવાયો, વિદ્યાર્થીઓ અને પ્રોફેસરની બેગ પણ ચેક કરાઇ
- સમામાં આવેલી નવરચના સ્કૂલ અને નવરચના વિદ્યાની વિદ્યાલયમાં તપાસ દરમિયાન કંઈ ન મળ્યું
વડોદરાની નવરચના સ્કૂલમાં બોમ્બ હોવાનો પ્રિન્સિપાલને આજે વહેલી સવારે 3.49 વાગ્યે ઇ-મેલ મળતાં સ્કૂલના સત્તાધીશો અને પોલીસને જાણ કરી હતી. નવરચનાની વડોદરા શહેરમાં ભાયલી વિસ્તારની નવરચના ઇન્ટરનેશનલ સ્કૂલ સમા વિસ્તારમાં આવેલી નવરચના સ્કૂલ અને નવરચના વિદ્યાની વિદ્યાલય એમ ત્રણ સ્કૂલ આવેલી છે, જેમાં ભાયલી વિસ્તારની સ્કૂલના પ્રિન્સિપાલને ધમકીભર્યો ઇ-મેઈલ મળ્યો હતો. આ ઈ-મેલને પગલે પોલીસ દ્વારા ત્રણેય સ્કૂલમાં બોમ્બ સ્ક્વોડ અને ડોગ સ્ક્વોડની ટીમ દ્વારા ચેકિંગ કરવામાં આવ્યું હતું. સાથે જ બસ સહિતનાં વાહનો અને આસપાસના વિસ્તારમાં પણ તપાસ કરવામાં આવી હતી. જેમાં સમા વિસ્તારમાં આવેલી નવરચના સ્કૂલ અને નવરચના વિદ્યાની વિદ્યાલયમાં પોલીસને તપાસ દરમિયાન કંઈ મળ્યું નથી. ભાયલી નવરચના ઇન્ટરનેશનલ સ્કૂલની હોસ્ટેલમાં પણ ચેકિંગ કરાયુ હતું. નવરચના યુનિવર્સિટીમાં હજી પણ ચેકિંગ ચાલી રહ્યું છે. નવરચના ઇન્ટરનેશનલ સ્કૂલ મેનેજમેન્ટ તાલુકા પોલીસ સ્ટેશનમાં બોમ્બની ધમકી મામલે પોલીસ ફરિયાદ નોંધાવશે.
તાજેતરની માહિતી અનુસાર, વડોદરાના ભાયલી વિસ્તારમાં આવેલી એક અને સમા વિસ્તારમાં આવેલી બે સ્કૂલને બોમ્બથી ઉડાડી દેવાની ધમકી મળી હોવાના અહેવાલ છે. બોમ્બની ધમકીની સૂચના મળતાં બોમ્બ સ્કવૉડ અને પોલીસ ટુકડી ઘટનાસ્થળે ધસી આવી હતી અને તાત્કાલિક ધોરણે તપાસ હાથ ધરી હતી. જોકે હાલમાં પણ તપાસ ચાલી રહી છે અને બોમ્બની ધમકી વચ્ચે બાળકોને તાત્કાલિક સ્કૂલમાંથી રજા આપી દેવામાં આવી હોવાની માહિતી મળી રહી છે. જે જે સ્કૂલોને બોમ્બથી ઉડાવી દેવાની ધમકી આપવામાં આવી છે તેમાં નવરચના યુનિવર્સિટી, સમા ઇન્ટરનેશનલ સ્કૂલ અને નવરચના વિદ્યાની વિદ્યાલયનો સમાવેશ થાય છે.
આજે વહેલી સવારે 4 વાગ્યાની આસપાસ સ્કૂલને બોમ્બથી ઉડાવી દેવાની ધમકી આચાર્યને મળી હતી. નવરચના ઇન્ટરનેશનલ સ્કૂલના પ્રિન્સિપાલે વહેલી સવારે ઊઠીને ઈમેલ ચેક કરતા તેઓ ચોંકી ઊઠ્યા હતા અને તુરંત જ સ્કૂલ સત્તાધીશો અને પોલીસને જાણ કરી હતી. ઘટનાની જાણ કરાતા ફાયર બ્રિગેડની ટીમ પણ નવરચના યુનિવર્સિટી ખાતે પહોંચી ગઈ છે. બોમ્બ સ્ક્વોડ અને ડોગ સ્ક્વોડની ટીમો અંદર ગઈ હતી. યુનિવર્સિટીની બહાર પોલીસ કાફલો ખડકાઈ ગયો હતો. આ ઉપરાંત સ્કૂલ બસોમાં પણ ચેકિંગ કરવામાં આવી રહ્યું હતું. એક એમ્બ્યુલન્સ પણ નવરચના ઇન્ટરનેશનલ સ્કૂલ પહોંચી ગઈ હતી.
નવરચના યુનિવર્સિટી બિલ્ડિંગમાં વાહનોનું ચેકિંગ કરીને અને આઇડી કાર્ડ ચેક કરીને જ દરેક વ્યક્તિને પ્રવેશ આપવામાં આવી રહ્યો હતો. તમામ વિદ્યાર્થીઓ અને પ્રોફેસરના બેગ પણ ચેક કરવામાં આવી રહ્યાં છે. યુનિવર્સિટી બિલ્ડિંગને ખાલી કરાવવામાં આવ્યું નથી. યુનિવર્સિટી બિલ્ડિંગમાં વિદ્યાર્થીઓ-પ્રોફેસરો જઈ રહ્યા હતા. માત્ર સ્કૂલ બિલ્ડિંગમાં પ્રવેશ આપવામાં આવ્યો ન હતો.
ભાયલી નવરચના ઇન્ટરનેશનલ સ્કૂલના પ્રિન્સિપાલ કાશ્મીરા જયસ્વાલએ જણાવ્યું હતું કે, સવારે 4.30 વાગ્યે મેં મારા પ્રિન્સિપલના આઇડી પર મેઈલ જોયો હતો. જેમાં બોમ્બ મુકાયાની ધમકી આપવામાં આવી હતી, જેથી મેં તુરંત જ પોલીસને જાણ કરી હતી. જેથી તમામ એજન્સીઓ એલર્ટ થઈ ગઈ હતી અને પોલીસ તુરંત જ આવી ગઈ હતી અને તપાસ શરૂ કરી હતી. આ પહેલા વિદ્યાર્થીઓને મેસેજ કરીને સ્કૂલમાં ન આવવા માટે જણાવી દેવાયું હતું. પોલીસનું ક્લિયરન્સ મળતા જ સ્કૂલ ચાલુ કરી દેવામાં આવશે. નવરચના યુનિવર્સિટી કેમ્પસની સ્કૂલને સવારથી બંધ કરવામાં આવી હતી, જ્યારે આજ કેમ્પસની કોલેજ ચાલુ હતી. અહીં વિદ્યાર્થીઓ-પ્રોફેસરોની અવરજવર પણ જોવા મળી હતી. જે બાદ 10.40 વાગ્યાની આસપાસ કોલેજના વિદ્યાર્થીઓને રજા આપી દેવામાં આવી હતી.
આ મામલે ડીવાયએસપી ચેતના ચૌધરીએ જણાવ્યું હતું કે, નવરચના ઇન્ટરનેશનલ સ્કૂલના પ્રિન્સિપલને ધમકી ભર્યો મેઈલ મળતા સ્થાનિક પોલીસ એલસીબી, ગ્રામ્ય એસઓજી સહિતની ટીમો સ્કૂલમાં પહોંચી ગઈ હતી અને સ્કૂલ કેમ્પસમાં તપાસ કરવામાં આવી હતી. પાઇપમાં પણ તપાસ કરવામાં આવી હતી. જો કે, અત્યાર સુધીની તપાસમાં કંઈ પણ મળ્યું નથી. હજી યુનિવર્સિટી બિલ્ડિંગ અને ગ્રાઉન્ડની તપાસ કરવામાં આવી રહી છે.
ઉલ્લેખનીય છે કે, ઇમેઇલ અંગે તપાસ કરતા ડાર્કવેબ પરથી પ્રિન્સિપાલ કાશ્મીરા જયસ્વાલને ઇમેઇલ મોકલવામાં આવ્યો હોવાનું પ્રાથમિક તપાસમાં બહાર આવ્યું છે. જોકે આ ઇમેઇલ કોણે મોકલ્યો છે તે અંગે તપાસ કરવા વડોદરા સાયબર ક્રાઇમની ટીમ પણ તપાસમાં જોડાઈ છે.
