- પોસ્ટ માસ્ટર વિક્રમસિંહ વાઘેલાએ ત્રણ ખાતાધારકોના બચતના રકમ રૂપિયા 98 હજાર મેળવીને તેની પાસબુકમાં એન્ટ્રી કરી હતી પરંતુ, રકમ પોસ્ટ ઓફિસમાં જમા ન કરાવ્યા

વડોદરાના નજીક આવેલા દુમાડ પોસ્ટ ઓફિસના પોસ્ટ માસ્ટર દ્વારા ત્રણ ખાતાધારકો પાસેથી બચત રકમ રૂપિયા 98 હજાર મેળવીને તેની પાસબુકમાં એન્ટ્રી કરી હતી પરંતુ, આ રકમ પોસ્ટમાં જમા કરાવવાના બદલે અંગત કામમાં વાપરી નાખ્યા હતા. મુખ્ય ઓફિસના ઓડિટમાં વિગતો બહાર આવતાં પોસ્ટ માસ્ટર સામે મંજુસર પોલીસ મથકમાં ફરિયાદ નોંધવામાં આવી છે.

મંજુસર પોલીસ મથકમાં દક્ષિણ ઉપ વિભાગના ઇન્સ્પેક્ટર ઓફ પોસ્ટ દ્વારા આપવામાં નોંધાવવામાં આવેલી ફરિયાદ અનુસાર, ફતેગંજ પોસ્ટ ઓફિસ દ્વારા કરવામાં આવેલા વાર્ષિક ઓડિટના વિસ્તૃત અહેવાલમાં દુમાડ પોસ્ટ ઓફિસના પોસ્ટ માસ્ટર વિક્રમસિંહ ગંભીરસિંહ વાઘેલા દ્વારા ગેરરીતિ આચરવામાં આવી હોવાનું સપાટી પર આવ્યું હતું.

ફરિયાદમાં જણાવ્યું છે કે, પોસ્ટ માસ્તરે વર્ષ 2009માં દશરથ ગામે રહેતી મહિલાનું એકાઉન્ટ ખોલાવ્યું હતું. અલગ-અલગ સમયે મહિલાના કુલ રૂપિયા 34 હજાર સ્વીકારીને તેની અસલ નોંધ પાસબુકમાં કરી હતી પરંતુ, તે પૈસા જમા કરાવ્યા ન હતા. એવી જ રીતે દુમાડમાં રહેતા મહિલા ખાતાધારકનું ખાતું વર્ષ 2012માં ખોલવામાં આવ્યું હતું. જેમાં અલગ-અલગ સમયે રૂપિયા 58 હજાર લેવામાં આવ્યા હતા. જેની અસલ નોંધ પાસબુકમાં કરવામાં આવી હતી પરંતુ, તે પૈસા પોસ્ટમાં જમા કરાવવામાં આવ્યા ન હતા.

ત્રીજા કિસ્સામાં દુમાડમાં રહેતા ખાતાધારકનું ખાતું વર્ષ 2008માં ખોલવામાં આવ્યું હતું. જેના રૂપિયા 6 હજાર સ્વીકારમાં આવ્યા હતા અને એન્ટ્રી પાડવામાં આવી હતી પરંતુ, તે રકમ પોસ્ટમાં જમા કરાવવામાં આવ્યા ન હતા. વિક્રમસિંહ દ્વારા ત્રણ એકાઉન્ટધારકના મળીને કુલ રૂપિયા 98 હજારની ઉચાપત કરવામાં આવી હતી. આ બનાવ અંગે મંજુસર પોલીસ મથકમાં વિક્રમસિંહ ગંભીરસિંહ વાઘેલા (રહે. દુમાડ, વડોદરા ગ્રામ્ય) સામે ફરિયાદ દાખલ કરવામાં આવી છે. પોલીસે ફરિયાદના આધારે વધુ તપાસ હાથ ધરી .