- ગેરકાયદે શેડ, ઓટો રીપેરીંગના ગલ્લા સહિત દુકાનોના લટકણીયા તથા પાકા ઓટલા બુલડોઝરના સહારે તોડી રોડ રસ્તા ખુલ્લા કરાયા, 4 ટ્રક ભરી સામાન જપ્ત

વડોદરા શહરમાં અવાર નવાર દબાણને લઈ ઝુંબેશ ચલાવવામાં આવતી હોઈ છે જે માત્ર બે-ચાર દિવસ માટે હોય છે, પરંતુ શહેરોમાં જ્યારથી ભાજપ પૂર્વ કોર્પોરેટરોના પુત્રની હત્યા થઈ છે ત્યારબાદ કોર્પોરેશન દ્વારા દબાણ ઝુંબેશ ચલાવવામાં આવી છે તે આજદિન સુધી ચાલી રહી છે. આજે દબાણ શાખાની ટીમે શહેરના પૂર્વ વિસ્તારમાં વૃંદાવન ચાર રસ્તાથી હાઇવે તરફ બાપોદ સુધીના રોડ રસ્તાની બંને બાજુના હંગામી દબાણો, દુકાનની આગળ બનાવેલા ગેરકાયદે શેડ, રોડ રસ્તા પર મુકાયેલા ઓટો રીપેરીંગના ગલ્લા સહિત દુકાનોના લટકણીયા તથા પાકા બનાવેલા ઓટલા બુલડોઝરના સહારે દબાણ શાખાની ટીમે તોડી રોડ રસ્તા ખુલ્લા કર્યા હતા. કાર્યવાહી દરમિયાન કુલ ચાર ટ્રક જેટલો સામાન કબજે કરાયો હતો.

વડોદરા શહરમાં કોર્પોરેશનના પૂર્વ ભાજપ નગરસેવકના પુત્રની થયેલી હત્યા બાદ શહેરભરમાંથી ગેરકાયદે દબાણનો સફાયો કરવા પાલિકાના મ્યુનિસિપલ કમિશનર દિલીપ રાણાએ સૂચના આપી હતી. ત્યારબાદ શરૂ થયેલી દબાણ હટાવ ઝુંબેશ સતત 22મા દિવસે પણ યથાવત જોવા મળી રહી છે, એક પણ દિવસ આ ઝુંબેશ બંધ રહી નથી. શહેરના પૂર્વ પશ્ચિમ ઉત્તર દક્ષિણ ચારે બાજુએ થયેલા હંગામી દબાણનો સફાયો થતાં પાલિકાની કાર્યવાહીની શહેરભરમાં સરાહના થઈ રહી છે, પરંતુ આવી કામગીરી પાલિકા તંત્ર દ્વારા સમી સાંજથી શરૂ કરી રાત સુધી જારી રાખવામાં આવે તેવી લોકમાગ છે.

આજે શહેરના પૂર્વ વિસ્તારમાં વહેલી સવારથી દબાણ હટાવો ઝુંબેશ શરૂ કરાઈ હતી. વોર્ડ નં. 5, 15માં વૃંદાવન સર્કલથી બાપોદ હાઇવે સુધીના હંગામી દબાણો અને બાજુની દુકાનો બનાવાયેલા રોડ, લારી ગલ્લા, વેપાર ધંધા માટે રોડ રસ્તા પર બનાવેલા કાચા બનાવેલા હંગામી શેડ, તથા દુકાનદારોના લટકણીયા, ચા ખાણી-પીણીની લારીઓ તથા રોડ પર કેટલાય બનાવેલા ઓટલા પર બુલડોઝર ફેરવી દેવાયું હતું. આ દરમિયાન કેટલીય જગ્યાએ દબાણની ટીમ સાથે બોલાચાલી અને રકઝકના દૃશ્યો સર્જાતા બંદોબસ્તમાં રહેલા પોલીસ સ્ટાફે મામલો સંભાળ્યો હતો. જોકે કાર્યવાહી દરમિયાન દબાણ શાખાની ટીમે કુલ ચાર ટ્રક જેટલો સામાન કબ્જે કર્યો હતો. પાલિકા દબાણ શાખાની ટીમ સાથે કાર્યવાહીમાં પાણીગેટ પોલીસ સ્ટેશનનો સ્ટાફ, વોર્ડ નં. 5 અને 15નો સ્ટાફ, ફાયર બ્રિગેડ, વીજ ખાતા સહિત ફાયર બ્રિગેડની ટીમ તથા અન્ય સ્ટાફ પણ ઉપસ્થિત થયો હતો.

ઉલ્લેખનીય છે કે, પૂર્વ ભાજપ નગરસેવકના પુત્રની થયેલી હત્યા બાદ શહેરભરમાંથી ગેરકાયદે દબાણનો સફાયો કરવા પાલિકા મ્યુનિસિપલ કમિશનર દિલીપ રાણાએ સૂચના આપી હતી. ત્યારબાદ શારૂ થયેલી દબાણ હટાવ ઝુંબેશ સતત ૨૨ દિવસથી ચાલી રહી છે. એક પણ દિવસ આ ઝુંબેશ બંધ રહી નથી. શહેરના પૂર્વ પશ્ચિમ ઉત્તર દક્ષિણ ચારે બાજુએ થયેલા હંગામી દબાણનો સફાયો થતાં પાલિકાની કાર્યવાહીની શહેરભરમાં સરાહના થઈ રહી છે.