- મૂળ સુરતના પલસાણા ખાતે રહેતો આરોપી તુષારકુમાર પાટણવાડીયાને માણેજા ક્રોસિંગ ખાતેથી ઝડપાયો, વધુ તપાસ માટે હરણી પોલીસ સ્ટેશન સોંપવામાં આવ્યો

કાર સેલ્ફ ડ્રાયવિંગના બહાને ભાડેથી મેળવી કાર કે ભાડું નહી આપી ફરીયાદીની જાણ બહાર ગાડીને બારોબાર ગિરવે મુકી ઠગાઇ કરવાના ગુનામાં સંડોવાયેલ અને નાસતા ફરતા રીઢા આરોપીને શહેર ક્રાઇમ બ્રાન્ચ દ્વારા ઝડપી પાડવામાં આવ્યો છે.

વડોદરા શહેરના મિલકત સંબધી ગુનાઓમાં સંડોવાયેલ અને પોલીસ ધરપકડ ટાળવા માટે નાસતા ફરતાં આરોપીઓને શોધી કાઢવાની સુચના પોલીસના ઉચ્ચ અધિકારીઓ દ્વારા આપવામાં આવી હતી. જે અંતર્ગત ક્રાઇમ બ્રાન્ચના પોલીસ ઇન્સપેકટર આર.જી. જાડેજા તેમજ પોલીસ ઇન્સપેકટર એચ.ડી. તુવરની દોરવણી હેઠળ તેઓની ટિમના માણસો સાથે નાસતા ફરતા આરોપીઓની શોધખોળ હાથ ધરી હતી.

આ દરમિયાન 2024માં હરણી પોલીસ સ્ટેશનમાં નોંધાયેલ વિશ્વાસઘાત અને ઠગાઇના ગુનામાં સંડોવાયેલ આરોપી તુષારકુમાર હિતેદ્ર પાટણવાડીયાનો ગુનો રજીસ્ટર થયા બાદ ફરાર થઇ ગયો હતો. આરોપીની જે તે વખતે તપાસ કરવા છતા મળી નહી આવતા આરોપીને નાસતો ફરતો આરોપી જાહેર કર્યો હતો. વડોદરા ક્રાઈમ બ્રાન્ચ એ ટીમે ટેકનીકલ હ્યુમન સોર્સીસ આધારે કરેલ તપાસ દરમિયાન નાસતો આરોપી હાલ માણેજા ક્રોસિંગ પાસે વિનાયક પેરેડાઇઝ ખાતે રહેતો હોવાની માહીતી મળતા ટીમે નાસતા ફરતા આરોપી અંગે ટીમે ખાનગી રાહે વોચ તપાસ કરી હતી. જેમાં આરોપી તુષારકુમાર હિતેદ્ર પાટણવાડીયા (મુળ રહે. હરીપુરા ગામ તા.પલસાણા, જી.સુરત)ને માણેજા ક્રોસિંગ ખાતેથી ઝડપાઈ ગયો હતો અને આરોપીને આગળની વધુ તપાસ માટે હરણી પોલીસ સ્ટેશન સોંપવામાં આવ્યો છે.