- અકસ્માતમાં બાઇકચાલકને પણ ઇજાઓ પહોંચતા તેને સારવાર માટે હોસ્પિટલ ખાતે ખસેડાયો, સારવાર બાદ ધરપકડ કરાશે

વડોદરાના વાઘોડિયા નજીક શંકરપુરા ગામથી પાલડી-મુઢેલા જતા રોડ ઉપર પરથી પુરપાટ પસાર થઇ રહેલા મોટરસાયકલ ચાલકે એક રાહદારીને અડફેટમાં લીધો હતો. મોટરસાઇકલની અડફેટે આવેલા વ્યક્તિનું ઘટના સ્થળે કમકમાટીભર્યું મોત નીપજ્યું હતું. આ બનાવ અંગે વાઘોડિયા પોલીસે અકસ્માતનો ગુનો દાખલ કરી કાર્યવાહી હાથ ધરી છે.

મળતી માહિતી અનુસાર વાઘોડિયા તાલુકાના શંકરપુરા ગામના બસ સ્ટેન્ડની બાજુમાં રહેતા કનુભાઈ લલ્લુભાઇ પરમાર બુધવારે પાલડીથી મુઢેલા જતા રોડ ઉપર પર ચાલતા ચાલતા જઈ રહ્યા હતા. આ દરમિયાન પાછળથી પૂરઝડપે આવી રહેલા મોટરસાયકલ ચાલકે કનુભાઈને અડફેટે લેતા તેઓ હવામાં ફંગોળાઈ નીચે પટકાયા તેમને માથાના ભાગે ગંભીર ઈજાઓ પહોંચતા તેમનું ઘટના સ્થળ પર જ મોત નીપજ્યું હતું. આ બનાવમાં મોટરસાયકલ ચાલક સૌરભભાઈ સતિષભાઈને પણ ઇજાઓ પહોંચતા તેને સારવાર માટે હોસ્પિટલ ખાતે ખસેડવામાં આવ્યો હતો.

બુધવારે બનેલા આ બનાવ અંગેની ફરિયાદ જરોદ પોલીસ મથકમાં નોંધાઈ હતી. જરોદ પોલીસે 19 વર્ષિય મોટરસાયકલ ચાલક સૌરભ સતીષભાઈ માનકર સામે ગુનો દાખલ કરી કાર્યવાહી હાથ ધરી હતી, મોટરસાયકલ ચાલક હાલ સારવાર હેઠળ હોય તેની ધરપકડ કરી નથી. તેની સારવાર બાદ પોલીસ દ્વારા તેની ધરપકડ કરી આગળની કાયદેસરની કાર્યવાહી હાથ ધરવામાં આવશે.