શહેરના તરસાલી બાયપાસ પાસેથી મળેલા વિદેશી દારૂના કેસમાં એક વર્ષથી નાસતા ફરતા આરોપીને મકરપુરા પોલીસે ઝડપી પાડયો છે.
વડોદરાના મકરપુરા પોલીસને ઓગસ્ટ-૨૦૨૨માં માહિતી મળી હતી કે, તરસાલી બાયપાસ પાસે કાન્હા રેસિડેન્સી રોડ પર અંકિતસિંહ શેખાવત તથા લવકેશ દિવાકર ભેગા મળીને વિદેશી દારૂનો જથ્થો કાળા કલરની સ્કોર્પિયો કારમાંથી અન્ય કારમાં હેરાફેરી કરે છે. જેથી, પોલીસે ઉપરોક્ત સ્થળે જઇને તપાસ કરતા બે કાર ઉભી હતી.પોલીસે બંને કારને કોર્ડન કરીને એક કારમાંથી અંકિતસિંહ છીગનસિંહ શેખાવત તથા ગૌરાંગ ઉર્ફે પિન્ટુ મહેશભાઇ સોલંકી (બંને રહે.રેવા પાર્ક, તરસાલી) મળી આવ્યા હતા. જ્યારે અન્ય કારમાંથી લવકેશ ઉર્ફે સરદાર સુખદેવભાઇ દિવાકર (રહે.વૈેકુંઠ સોસાયટી, કલાલી, માંજલપુર) મળી આવ્યો હતો. બંને કારમાંથી પોલીસે વિદેશી દારૂની ૫૨૮ બોટલ કબજે કરી હતી.
પોલીસે દારૂ, કાર અને મોબાઇલ ફોન મળીને કુલ રૂપિયા ૪.૬૩ લાખનો મુદ્દામાલ કબજે કર્યો હતો. આ દારૂનો જથ્થો શરફરાજઅહેમદ (રહે.નાગરવાડા), યુવરાજ રાજપૂત (રહે.દંતેશ્વર) એ આપ્યો હોવાનું પ્રાથમિક પૂછપરછમાં ખૂલતા પોલીસે તેઆને વોન્ટેડ જાહેર કર્યા હતા. આ ગુનામાં વોન્ટેડ આરોપી સરફરાજ અહેમદભાઇ શેખ (રહે. નવી ધરતી, ગોલવાડ, નાગરવાડા)ને મકરપુરા પી.આઇ. જે.એન.પરમારે ઝડપી પાડયો છે.
