- વિદ્યાર્થીઓને સહી સલામત કલાસીસની બહાર કાઢવામાં આવ્યા

વડોદરા શહેરના સુભાનપુરા વિસ્તારમાં આવેલા ચાણક્યપૂરી કોમ્પ્લેક્ષમાં આવેલા ખાનગી ટ્યુશન કલાસીસના એસીમાં  શોર્ટસર્કિટના કારણે આગ લાગતા નાસભાગ મચી ગઈ હતી. ઘટનાની જાણ ફાયરબ્રિગેડને કરવામાં આવતા ફાયર બ્રિગેડનો કાફલો ઘટના સ્થળે પહોચ્યો હતો. જયારે કલાસીસના વિદ્યાર્થીઓને સહી સલામત રીતે બહાર કાઢવામાં આવ્યા હતા.

વડોદરા શહેરના સુભાનપુરા હાઈ ટેન્શન રોડ પર ચાણક્યપૂરી કોમ્પ્લેક્ષ આવેલું છે. કોમ્પ્લેક્ષમાં ચોથા માળે ખાનગી ટ્યુશન કલાસીસમાં આજે સવારના સુમારે વિદ્યાર્થીઓ જ્યારે હાજર હતા ત્યારે અચાનક એ.સીમાં શોર્ટ સર્કિના કારણે આગ લાગતા નાસભાગ મચી ગઈ હતી. તમામ વિદ્યાર્થીઓને સહી સલામત કલાસીસની બહાર કાઢવામાં આવ્યા હતા. જયારે સ્થાનિકોએ ફાયર બ્રિગેડને જાણ કરતા ફાયરબ્રિગેડનો કાફલો ઘટના સ્થળે દોડી આવી અને આગ પર કાબુ મેળવવાની તજવીજ હાથ ધરી હતી. સદનસીબે ઘટનામાં કોઈ જાનહાની થવા પામી નથી. સમય સુચકતાથી વિદ્યાર્થીઓને બહાર કાઢી લેતાં તક્ષશિલા જેવી હોનારત થતાં ટળી હતી.