- ભાદરવા અને સાકરદા ગામની વચ્ચે આવેલ રાણિયા ગામ પાસે રહસ્યમય અકસ્માત થતાં યુવક પોતાના બાઈક સાથે ગટરમાં પટકાયો હતો, જેમાં તેનું મોત નીપજ્યું હતું

- ભાદરવા પોલીસે અકસ્માતના બનાવનું ચોક્કસ કારણ જાણવા તપાસ શરૂ

વડોદરા જિલ્લાના સાવલી તાલુકાના ભાદરવા સાકરદા રોડ ઉપર રાણિયા ગામ પાસે વહેલી સવારે રહસ્યમય અકસ્માતમાં ભાદરવા ગામના યુવાનનું અકસ્માતમાં કરુણ મોત નિપજ્યું હતું. પોલીસે યુવાનનો મૃતદેહ કબજે કરી કાર્યવાહી હાથ ધરી છે. તે સાથે અકસ્માતના બનાવનું ચોક્કસ કારણ જાણવા માટે તપાસ શરૂ કરી છે. આ બનાવે ભાદરવા ગામ સહિત આસપાસના ગામોમાં ચકચાર જગાવી મૂકી છે.

મળેલી માહિતી પ્રમાણે સાવલી તાલુકાના ભાદરવા ગામમાં રહેતો 19 વર્ષીય મયુરસિંહ મહેન્દ્રસિંહ ભૂમેલા મંજુસર જીઆઇડીસીમાં ખાનગી કંપનીમાં નોકરી કરે છે. મયુરસિંહ વડોદરા નજીક આવેલા શેરખી ગામમાં મોડી સાંજે મિત્રના લગ્નમાં ગયો હતો. મિત્રના લગ્નમાં હાજરી આપીને વહેલી સવારે પરત ભાદરવા ફરી રહ્યો હતો. દરમિયાન ભાદરવા અને સાકરદા ગામની વચ્ચે આવેલ રાણિયા ગામ પાસેની ગટરમાં પોતાના બાઈક સાથે પટકાયો હતો. જેમાં તેનું સ્થળ પર કરુણ મોત નીપજ્યું હતું.

આજે સવારે આ રોડ પરથી પસાર થઈ રહેલા વ્યક્તિએ બનાવની જાણ ભાદરવા પોલીસને કરતા પોલીસ સ્થળ પર દોડી ગઈ હતી અને લાશનો કબજો લઈ સ્થળ ઉપરથી મળેલી મોટર સાઇકલના નંબરના આધારે લાશની ઓળખ કરવા માટે તપાસ શરૂ કરી હતી. દરમિયાન રહસ્યમય અકસ્માતમાં મોતને ભેટેલ યુવાન ભાદરવા ગામનો મયુરસિંહ ભૂમેલા હોવાનું બહાર આવ્યું હતું.

દરમિયાન ભાદરવા પોલીસે બનાવની જાણ તેના પરિવારજનોને કરતા પરિવારજનો પણ દોડી આવ્યા હતા. પરિવાર મયુરસિંહની લાશ જોતા પરિવાર સ્તબ્ધ થઈ ગયું હતું. આ બનાવને પગલે મયુરસિંહના ગામમાં રહેતા મિત્રો, શુભેચ્છકો તેમજ કુટુંબીજનો પણ દોડી આવ્યા હતા. મયુરસિંહના મોતથી પરિવારજનો શોકમાં ગરકાવ થઈ ગયા હતા. પરિવારજનોના હૈયાફાટ રૂદને ગામમાં સન્નાટો પાથરી દીધો હતો.

રહસ્યમય અકસ્માતમાં મોતને ભેટેલ મયુરસિંહના કાકાએ જણાવ્યું હતું કે, ભત્રીજો શેરખી ગામમાં રહેતા તેના મિત્રના લગ્નમાં ગયો હતો. વહેલી સવારે પોતાની મોટરસાઇકલ ઉપર ભાદરવા ઘરે આવી રહ્યો હતો. આ દરમિયાન રાણિયા ગામ પાસે અકસ્માતમાં મોતને ભેટ્યો છે.

ભાદરવા ગામ સહિત આસપાસના ગામોમાં ગમગીની ફેલાવી દેનારા આ બનાવ અંગે ભાદરવા પોલીસે અકસ્માતે મોતનો ગુનો દાખલ કરી કાર્યવાહી હાથ ઘરી છે. આ બનાવે ભાદરવા ગામ સહિત આસપાસના ગામોમાં ચકચાર જગાવી મૂકી હતી.