ગોત્રીમાંથી ભંગાર ફર્નિચરની આડમાં લઇ જવાતો વિદેશી દારૂ ભરેલી ટ્રક ઝડપાઇ,આરોપીઓ ફરાર

મેદાનમાં દારૂનો જથ્થો ઠલવાતો હોવાની બાતમી આધારે ગોત્રી પોલીસે દરોડો પાડ્યો હતો

MailVadodara.com - A-truck-full-of-foreign-liquor-was-caught-under-the-guise-of-scrap-furniture-from-Gotri-the-accused-are-absconding

- ગોત્રી પોલીસે 200 પેટી વિદેશી દારૂનો જથ્થો ઝડપી, પોલીસે બિનવારસી મળેલી પંજાબ પાસીંગની ટ્રક નંબરના આધારે આરોપીઓની શોધખોળ શરૂ કરી


શહેરના ગોત્રી પોલીસે ભંગાર ફર્નિચરની આડમાં લઇ જવાતો 200 પેટી દારૂ ભરેલો ટ્રક ઝડપી પાડી કાર્યવાહી હાથ ધરી છે. દારૂ ભરેલી બિનવારસી ટ્રક પોલીસે કબજે કરી આરોપીઓની શોધખોળ શરૂ કરી છે. આરોપીઓ ઝડપાયા બાદ ચોંકાવનારી વિગતો બહાર આવે તેવી શક્યતાઓ છે.


વર્ષના અંતિમ દિવસ 31 ડિસેમ્બર નજીક આવતાની સાથે જ પોલીસ તંત્ર દ્વારા બૂટલેગરો ઉપર ચાંપતી નજર રાખવામાં આવી છે. આમ છતાં બૂટલેગરો દ્વારા અવનવા કિમિયાઓ અજમાવીને દારૂ ઘૂસાડવામાં આવતો હોય છે. ત્યારે શહેરના ગોત્રી વિસ્તારમાં ખુલ્લા મેદાનમાં પંજાબ પાસીંગની ટ્રકમાં ફર્નિચરની આડમાં દારૂનો જથ્થો ઠલવાતો હોવાની બાતમીના આધારે ગોત્રી પોલીસ દ્વારા દરોડો પાડી ભંગારના ફર્નિચરના સામાનની આડમાં લઇ જવાતો ભારતીય બનાવટનો 200 પેટી વિદેશી દારૂનો જથ્થો ઝડપી પાડવામાં આવ્યો છે. આ કાર્યવાહીમાં પોલીસના હાથે કોઇ લાગ્યું નથી.


જોકે, ગોત્રી પોલીસે ટ્રક નંબરના આધારે આરોપીઓની શોધખોળ શરૂ કરી છે. આરોપીઓ ઝડપાયા બાદ ચોંકાવનારી વિગતો બહાર આવે તેવી શક્યતાઓને નકારી શકાય તેમ નથી. હાલ પોલીસે અજાણ્યા વ્યક્તિઓ સામે ગુનો દાખલ કરી કાર્યવાહી હાથ ધરી છે. ઉલ્લેખનીય છે કે, શહેરના દરજીપુરામાં સ્ટેટ મોનિટરિંગ સેલ દ્વારા દરોડો પાડી લાખો રૂપિયાનો દારૂનો જથ્થો ઝડપી પાડયો છે.

Share :

Leave a Comments