- દુકાનમાં આગ લગાવ્યા બાદ ભાગવા જતાં ચોરને સ્થાનિકોએ ઝડપી પોલીસ હવાલે કર્યો, લાશ્કરોએ સ્થાનિકોની મદદ લઇ બે કલાકની જહેમત બાદ આગ કાબૂમાં લીધી
વડોદરાના વાઘોડિયામાં આવેલા જનરલ સ્ટોરમાં ચોર ચોરી કરવા માટે ઘૂસ્યો હતો. ચોરે દુકાનમાંથી રોકડ રૂપિયા 2600ની ચોરી કર્યા બાદ દુકાનમાં આગ લગાવી દીધી હતી. દુકાનમાં આગ લગાવ્યા બાદ ભાગવા જતાં સ્થાનિકોએ તેણે ઝડપી પાડી પોલીસ હવાલે કર્યો હતો. વાઘોડિયા પોલીસે આરોપીની ધરપકડ કરી કાર્યવાહી હાથ ધરી છે. વાઘોડિયામાં મોડી રાત્રે બનેલા આ બનાવે ચકચાર જગાવી મૂકી હતી.
મળેલી માહિતી પ્રમાણે વાઘોડિયામાં મોટા પાઠક ફળિયામાં રાજેશભાઇ ગોવિંદભાઈ શાહ પરિવાર સાથે રહે છે. તેઓની વાઘોડિયા બજારમાં સાંઈ જનરલ સ્ટોર્સ નામની દુકાન આવેલી છે. તેઓની દુકાનમાં મોડી રાત્રે એક ચોર છત ઉપરથી દુકાનમાં ઘૂસ્યો હતો. અને દુકાનમાંથી રોકડ રૂપિયા 2600ની ચોરી કરી હતી.
ચોરી કર્યા બાદ ચોરે દુકાનમાં આગ લગાવી દીધી હતી. આગ વધુ પ્રસરે તે પહેલાં તે જે રસ્તેથી દુકાનમાં ઘૂસ્યો હતો તે રસ્તાએથી ભાગવા જતાં સ્થાનિકો તેને જોઇ ગયા અને તેને દબોચી લીધો હતો. બીજી બાજુ દુકાનમાંથી આગની જ્વાળાઓ નિકળતા જોતજોતામાં લોકોના ટોળા એકઠા થઇ ગયા હતા અને પાણી મારો ચલાવી આગને કાબૂમાં લેવાનો પ્રયાસ કર્યો હતો. આગના બનાવની જાણ દુકાન માલિક રાજેશભાઇ શાહને થતાં તેઓ પણ દોડી આવ્યા હતા.
બીજી બાજુ આ બનાવની જાણ એપોલો ફાયર બ્રિગેડને કરવામાં આવતા લાશ્કરો દોડી આવ્યા હતા અને સ્થાનિક લોકોની મદદ લઇ બે કલાકની જહેમત બાદ આગ કાબૂમાં લીધી હતી. જોકે આગ કાબુમાં આવે તે પહેલાં દુકાનની અંદરનો તમામ સામાન બળીને ખાક થઇ ગયો. આગના બનાવને પગલે વાઘોડિયા પોલીસ પણ આવી પહોંચી હતી. સ્થાનિક લોકોએ આગ લગાડનાર ચોરને પોલીસ હવાલે કરી દીધો હતો. પોલીસ તપાસમાં આગ લગાડનાર ચોર વાઘોડિયા એસ.ટી. ડેપો પાસે રહેતો અને છૂટક મજૂરી કામ કરતો ભરત શંકરભાઇ રાઠોડીયા ( ઉ.વ. 20)હોવાનું બહાર આવ્યું હતું. આ બનાવ અંગે દુકાન માલિક રાજેશભાઇ શાહે જણાવ્યું હતું કે, દુકાનમાં ઘૂસેલા ચોરે આગ લગાવી હતી. તેની પોલીસે અટકાયત કરી કાર્યવાહી હાથ ધરી છે. આગમાં તમામ સામાન બળીને ખાક થઇ ગયો છે. અંદાજે રૂપિયા 3 લાખનું નુકસાન થયું છે.
આગ બુઝાવવા માટે આવેલા એપોલો ટાયર કંપનીના ફાયરમેન કિશન પરમારે જણાવ્યું હતું કે, આગના બનાવનો કોલ મળતા સાથી સુનિલભાઇ સાથે આવી પહોંચ્યા હતા અને સ્થાનિક લોકોની મદદ લઇ બે કલાકની જહેમત બાદ આગ કાબૂમાં લીધી હતી. દુર્ઘટનામાં કોઇ જાનહાનિ થઈ નથી.
