- આરોપીએ સાત સરનામાનો ઉપયોગ કર્યો, ઠગ ટોળકી લિંક મોકલી પૈસા ટ્રાન્સફર કરાવતી
વીમા કંપનીઓમાં રોકાણ કરવાથી ટુંકાગાળામાં ઉંચા વળતરની લાલચ આપી 7.62 કરોડનું રોકાણ કરાવ્યા બાદ કમિશન અને નફો મળી 253 કરોડની બોનસની રકમ દર્શાવી છેતરપિંડી આચરનાર ટોળકી સામે CID ક્રાઇમ ગાંધીનગર ખાતે નોંધાયેલા ગુનાની તપાસ ચલાવી રહેલી પોલીસે આ ગુનામાં સંડોવાયેલા અને મૂળ ઉત્તરાખંડના અભયકુમાર રાજાલાલ પ્રસાદને દિલ્હીથી ઝડપી પાડી અત્રેની અદાલત સમક્ષ રજૂ કરી 12 દિવસના રિમાન્ડની માંગણી કરતા અદાલતે 7 દિવસના રિમાન્ડ મંજૂર કરવાનો હુકમ કર્યો હતો.
CID ક્રાઇમના સૂત્રો પાસેથી જાણવા મળતી વિગતો અનુસાર ઇન્સ્યોરન્સ કંપનીના રીઝનલ મેનેજર દિપક રાઠોર, એજન્ટ બાલાક્રિષ્નન ઐયર, આસિસ્ટન્ટ ઇશીકા મિશ્રા, એજન્ટનો સાહેબ અનુપ પરીક અલગ-અલગ મોબાઇલ નંબર અને વોટસએપ નંબરથી એચડીએફસી લાઇફ, શ્રીરામ લાઇફ ઇન્સ્યોરન્સ કંપનીના અલગ-અલગ પ્લાન દર્શાવી તેમાં રોકાણ કરશો તો ટૂંકા ગાળામાં ઉંચુ વળતર મળશે તેમ જણાવી રોકાણકાર પાસેથી અલગ-અલગ પ્લાનમાં કુલ 7.62 કરોડનું રોકાણ કરાવવામાં આવ્યું હતું. જેની સામે મેચ્યોરિટી નાણાં 1.20 કરોડ, એજન્ટ કમિશન 42.98 કરોડ તેમજ મળવાપાત્ર બોનસ 89.79 કરોડ મળી કુલ 253.73 કરોડ બોનસ દર્શાવી આઇસીઆઇસીઆઇ, એચડીએફસી બેન્ક ચાર્જીસ દર્શાવી છેતરપિંડી આચરી હતી.
આ ટોળકી સામે 7.62 કરોડની છેતરપિંડી આચરવાનો ગુનો ગત 28મીએ ગાંધીનગર CID ક્રાઇમ ખાતે નોંધાયો હતો. જેની તપાસ ઇન્સ્પેક્ટર પી.ડી. મકવાણાએ હાથ ધરતા મોબાઇલ નંબરો સીડીઆર, એસડીઆર અને સીએએફની માહિતીના આધારે દિલ્હી ન્યુ અશોકનગર, વસુંધરા એન્કલેવમાં રહેતા અભયકુમાર રાજાલાલ પ્રસાદની દિલ્હીથી અટકાયત કરવામાં આવી હતી. બેન્ક ખાતાની ચકાસણી કરતા તેમાંથી નાણાંકીય વ્યવહારોની પણ વિગતો મળી આવતા તેની ધરપકડ કરવામાં આવી હતી. આ ટોળકીના અન્ય આરોપીઓ કોણ છે? તેની વિગતો મેળવવા તેમજ ફરિયાદમાં દર્શાવેલા મોબાઇલ નંબરધારકો કોણ છે. અભયકુમારે પોતાના ખાતામાં આવેલા 6.18 કરોડમાંથી ફ્લિપકાર્ટમાંથી 50 લાખ, મીશોમાંથી 31 જેટલી મોંઘી વસ્તુઓ ખરીદી ઓનલાઇન પેમેન્ટ કર્યું છે. આ વસ્તુઓની અલગ-અલગ સ્થળે ડિલિવરી લેવામાં આવી હતી. આરોપીએ સાત સરનામાનો ઉપયોગ કર્યો છે અને પોતે ઉત્તરાખંડના હલ્દવાણીમાં મકાન ભાડે રાખી પરિવાર સાથે રહેતો હતો.
તેણે કલ્યાણ જ્વેલર્સમાંથી લાખોના સોનાના દાગીના ખરીદેલા છે તે રિકવર કરવાના છે. આરોપી જે કંપનીમાં કામ કરે છે તે કંપનીમાં 100 લોકો કામ કરે છે, તેની પણ તપાસ કરવાની છે. કંપનીની દિલ્હી અને નોઇડા ખાતે ઓફિસ આવેલી છે. આ ઠગ ટોળકી લિંક મોકલી પૈસા ટ્રાન્સફર કરાવતી. તેમાં સામેલ આરોપીઓને શોધવા 12 દિવસના રિમાન્ડની માંગણી કરતા અદાલતે ગુનાની ગંભીરતાને જોતા 7 દિવસના રિમાન્ડ મંજૂર કરવાનો હુકમ કર્યો હતો.
