- પોલીસે 55,850ની કિંમતનો વિદેશી દારૂ, મોબાઇલ-કાર સહિત રૂપિયા 4 લાખ ઉપરાંત મુદ્દામાલ કબજે કર્યો, અન્ય એક વોન્ટેડ જાહેર

શહેરના આજવા રોડ સ્થિત ઋષિ વિશ્વામિત્રી સ્કૂલની સામે આવેલા ખુલ્લા મેદાનમાંથી વિદેશી શરાબના જથ્થા ભરેલી કાર સાથે એક ઈસમની બાપોદ પોલીસે અટકાયત કરી હતી.

બાપોદ પોલીસની ટીમને પેટ્રોલિંગ દરમિયાન ચોક્કસ માહિતી મળી હતી કે, આજવા રોડ રામદેવ નગર-2 ની પાસે આવેલ ઋષિ વિશ્વામિત્રી સ્કૂલની સામે ખુલ્લા ગ્રાઉન્ડમાં એક કારમાં વિદેશી દારૂનો જથ્થો છુપાવી રાખ્યો છે અને હાલ ઇંગ્લિશ દારૂનું કટીંગ કરવાનો છે. જે ચોક્કસ માહિતીને આધારે બાપોદ પોલીસે સ્થળ પર તપાસ કરતાં  એક કાર સાથે એક શખસ મળી આવ્યો હતો. જોકે, પોલીસને જોઈને શખસે ભાગવાનો પ્રયાસ કર્યો હતો. પણ પોલીસે તેને ઝડપી પાડયો હતો.

બાપોદ પોલીસે કારમાં તપાસ કરતા 55,850 રૂપિયાની કિંમતનો ભારતીય બનાવટનો વિદેશી દારૂ અને બિયરનો જથ્થો મળી આવ્યો હતો. પોલીસે દારૂ-બિયરનો જથ્થો અને કાર જપ્ત કરી છે. આરોપી સચિન ઉર્ફે સલંગ ડાહ્યાભાઇ પરમાર (રહે. રામદેવનગર-2, આજવા રોડ, વડોદરા)ની ધરપકડ કરી હતી. બાપોદ પોલીસે મોબાઇલ ફોન, કાર સહિત કુલ રૂપિયા 4 લાખ ઉપરાંતનો મુદ્દામાલ કબજે કર્યો હતો, જ્યારે ખોડીયાર નગર સ્થિત ડિ-માર્ટની પાછળ રહેતા કમલ ઉર્ફે કમુ તોલાણીને વોન્ટેડ જાહેર કરી તેની ધરપકડના ચક્રો ગતિમાન કર્યા છે. પોલીસે આ મામલે વધુ તપાસ શરૂ કરી છે.

ઉલ્લેખનીય છે કે, સ્ટેટ મોનિટરિંગ સેલે વડોદરા શહેરના બાપોદ પોલીસ સ્ટેશન વિસ્તારમાં બે દિવસ પહેલા જ દરોડો પાડીને 78 લાખનો દારૂ ઝડપી પાડયો હતો અને બાપોદ પોલીસને ઊંઘતી ઝડપી પાડી હતી.