પાદરા જંબુસર હાઇવે પર આવેલ કુરાલ ગામ નજીક ગોકુલ હોટલ પર ચા પીવા ગયેલા 66 વર્ષીય આધેડનું ડમ્પરની અડફેટે મોત નીપજ્યું હતું. ઘટનાની જાણ વડુ પોલીસને થતા પોલીસ સ્ટાફ ઘટના સ્થળે દોડી આવ્યો હતો અને કાયદેસરની કાર્યવાહી હાથ ધરી હતી.
વડોદરા જિલ્લાના પાદરા તાલુકાના સાંપલા ગામ ખાતે રહેતા 66 વર્ષીય ભીખાભાઈ મેલાભાઇ વસાવા વરસાદ પડતા પાદરા જંબુસર હાઈવે પર આવેલ ગોકુલ હોટલ ખાતે ચા પીવા ગયા હતા. ત્યારબાદ ચા પીને ભીખાભાઇ હોટલના ખુલ્લા મેદાનમાં લઘુશંકા કરવા ગયા હતા તે દરમિયાન ખુલ્લા મેદાનમાં પાર્ક કરેલા ડમ્પર ચાલકે પાછળ જોયા વગર ડમ્પર રિવર્સ લેતા ડમ્પરની પાછળ લઘુશંકા કરતા ભીખાભાઇ ડમ્પર નીચે કચડાઈ જતા ઘટના સ્થળે જ તેમનું કમકમાટી ભર્યું મોત નીપજ્યું હતું.
વડુ પોલીસે ઘટના સ્થળે પહોંચી ભીખાભાઇ વસાવાના મૃતદેહનો કબ્જો લઇ મૃતદેહને પીએમ અર્થે હોસ્પિટલ ખાતે ખસેડ્યો હતો અને ડમ્પર ચાલક વિરુદ્ધ ગુનો નોંધી કાયદેસરની કાર્યવાહી હાથ ધરી હતી. પોલીસે અકસ્માત કરી ઘટના સ્થળેથી ફરાર થઈ ગયેલ ડમ્પર ચાલકની શોધખોળ શરૂ કરી હતી.
