વડોદરા જિલ્લાના વાઘોડિયા તાલુકાના એક ગામમાં રહેતા પ્રેમી પંખીડાએ ગામની સીમમાં બાવળની ઝાડની ડાળી ઉપર દોરડાથી ફાંસો ખાઈને જીવન ટૂંકાવી લેતાં ચકચાર મચી ગઈ છે. પ્રેમના દિવસોમાં એકબીજાને આપેલા વચનો પૂરા થશે નહીં તેવા ડરથી પ્રેમ સંબંધનો કરુણ અંત લાવવાના આ બનાવ અંગે વાઘોડિયા પોલીસે આપઘાતનો ગુનો દાખલ કરી કાર્યવાહી હાથ ધરી છે.
મળેલી માહિતી પ્રમાણે, ગામના એક ફળિયામાં રહેતી 19 વર્ષીય યુવતી સિવણનું કામ કરતી હતી અને તેનાથી થોડે દૂર તે જ ફળિયામાં જ રહેતા અને ખાનગી કંપનીમાં નોકરી કરતા 20 વર્ષીય યુવક વચ્ચે છેલ્લા કેટલાય સમયથી પ્રેમ સંબંધ હતો. બંને એકબીજાને અતૂટ પ્રેમ કરતા હતા અને લગ્ન કરીને સંસારિક જીવન જીવવા ઈચ્છતા હતા, પરંતુ કોઈ કારણસર તેઓને પ્રેમ સંબંધ લગ્નમાં પરિણમશે નહીં, તેવો ડર સતાવી રહ્યો હતો. યુવક આપઘાત કરવાના દિવસે કંપનીમાંથી અડધી રજા મૂકી ઘરે આવી ગયો હતો અને યુવતી સાથે નક્કી કરેલા સમયે ગામની સીમમાં પહોંચી ગયો હતો અને બાવળના ઝાડની ડાળી પર એક જ દોરડાથી ફાંસો ખાઈ દુનિયાને અલવિદા કરી દીધી હતી.
બનાવની જાણ ગામમાં પ્રસરતા બંનેના પરિવારજનો સહિત ગામના લોકો ગામની સીમમાં દોડી ગયા હતા અને બંનેના મૃતદેહને ઝાડની ડાળીએથી નીચે ઉતારી જરોદ પોલીસને જાણ કરી હતી. જેને પગલે તુરંત જ પોલીસ ઘટનાસ્થળે દોડી આવી હતી અને પ્રેમી પંખીડાના મૃતદેહોનો કબજો લઈને પોસ્ટમોર્ટમ માટેની કાર્યવાહી હાથ ધરી હતી. પ્રેમી પંખીડાએ કયા ચોક્કસ કારણોસર આપઘાત કર્યો તે રહસ્ય છે, પરંતુ કહેવાય છે કે બંને લગ્ન કરવા માંગતા હતા પણ અલગ જ્ઞાતિના હોવાથી પરિવારજનો મંજૂરી નહીં આપે તેવા ડરથી ગામની સીમમાં જઈને અપઘાત કરી લીધો હતો. જોકે આ બનાવ અંગે જરોદ પોલીસે પ્રેમી પંખીડાના મોતનું ચોક્કસ કારણ જાણવા માટે જીણવટ ભરી તપાસ હાથ ધરી છે. તપાસ દરમિયાન ચોંકાવનારી વિગતો બહાર આવે તેવી શક્યતાઓને નકારી શકાય તેમ નથી.
