- ચાલુ વર્ષે અત્યાર સુધીમાં કોર્પોરેશનના ચોપડે ઝાડા અને પેટમાં દુખાવાના 3954 કેસ નોંધાયા છે જ્યારે ડેન્ગ્યુના 85 કેસ જોવા મળ્યા

હાલ કાળઝાળ ગરમીનું આક્રમણ ચાલુ છે ત્યારે હીટવેવને લીધે ગરમીથી થતાં રોગોની સાથે સાથે ખાસ પાણીજન્ય રોગચાળો જોવા મળી રહ્યો છે. વડોદરા કોર્પોરેશનના ચોપડે ચાલુ મે મહિના દરમિયાન અત્યાર સુધીમાં ઝાડા અને પેટમાં દુખાવાના 949 કેસ નોંધાયા છે. જોકે ચાલુ વર્ષે અત્યાર સુધીમાં ઝાડા અને પેટમાં દુખાવાના 3954 કેસ નોંધાયા છે. ચાલુ વર્ષે અત્યાર સુધીમાં ડેન્ગ્યુના 85 કેસ જોવા મળ્યા છે જેમાં માત્ર ચાલુ મહિનામાં ડેન્ગ્યુના 17 કેસ છે.

વડોદરા કોર્પોરેશનની આરોગ્ય સમિતિના પૂર્વ અધ્યક્ષના કહેવા મુજબ, દર વર્ષે ઉનાળામાં આ પ્રકારના કેસો જોવા મળતા જ હોય છે. જેમાં એક કારણ સનસ્ટ્રોક તો છે જ તેની સાથે સાથે વેકેશનના આ દિવસોમાં લોકોનું બહારનું ખાવા પીવાનું ખૂબ વધી જાય છે. જેમાં ખાસ તો ઠંડા પીણા, કુલરનું પાણી, બરફ ગોળા, શેરડીનો રસ તેમજ હોટલો અને લારીઓ પર ખાણીપીણીના કારણે પાણીજન્ય રોગચાળો વધુ થાય છે. કારણ કે આ બધા સ્થળે હાઇજેનિક બાબતો મુખ્ય કારણરૂપ રહે છે. લોકોએ બહાર ખાણીપીણી માટે વધુ જાગ્રત રહેવું જોઈએ. બરફ ગોળા, શેરડીનો રસ અને શરબતમાં વપરાતા બરફની ક્વોલિટીને લીધે પણ પાણીજન્ય રોગચાળો વકરે છે. જેમાં ટાઈફોઇડ, કમળો, મરડો, ઝાડા ઉલટી અને પેટમાં દુખાવાની ફરિયાદો મુખ્યત્વે છે. ટેમ્પરેચર ડાઉન થશે અને જેવો વરસાદ શરૂ થશે એ સાથે મચ્છરજન્ય રોગચાળો દેખાશે. જેમાં ચિકનગુનિયા, મેલેરિયા અને ડેન્ગ્યુનું પ્રમાણ પણ વધી જવાની શક્યા રહેલી છે.