- સ્ટેડિયમમાં બેસી સટ્ટો રમાડતા રાજસ્થાનના બે બુકી પાસેથી 91,480નો મુદ્દામાલ જ્યારે કોલકાતાના ત્રણ બુકી પાસેથી 1.90 લાખનો મુદ્દામાલ જપ્ત કરાયો

શહેર નજીક કોટંબી ખાતે હાલમાં વુમન પ્રિમીયર લીગની ક્રિકેટ મેચમાં રાજસ્થાન અને કોલકાતાથી આવેલા 5 ક્રિકેટ બુકીને સ્ટેડિયમમાં જ સટ્ટો રમાડતા જરોદ પોલીસે 15 મોબાઇલ ફોન અને હજારોની રોકડ સાથે રંગેહાથ ઝડપી પાડી જુગારધારા હેઠળ ગુનો દાખલ કરી કાર્યવાહી હાથ ધરી છે. બુકીઓ પ્લેનમાં વડોદરા આવ્યા હતા. પોલીસે 2.80 લાખ ઉપરાંતના મુદ્દામાલ સાથે 5 આરોપીની ધરપકડ કરી વધુ તપાસ હાથ ધરી છે.

જરોદ પોલીસ મથકના ઇન્સ્પેક્ટર જે.એ. બારોટને બાતમી મળી હતી કે, કોટંબી ક્રિકેટ સ્ટેડિયમમાં કેટલાક બુકીઓ ચાલુ મેચ દરમિયાન ક્રિકેટ સટ્ટો રમાડી રહ્યા છે. જેને પગલે નાયબ પોલીસ અધિક્ષક સી.એન. ચૌધરી અને મિલન મોદી તેમજ સ્ટાફ સાથે દરોડો પાડી સ્ટેડિયમમાં બેઠેલા મનોજ ઉર્ફે નોઇ પપ્પારામ ઉર્ફે પપ્પસિંગ બિશ્નોઇ (22), (રહે. ગુડા બિસ્નોઇયા, પોસ્ટ લુણી, જોધપુર, રાજસ્થાન), હનુમાન રામ શ્યામલાલ બિશ્નોઇ (24) (રહે.ગુડા બિસ્નોઇયા, પોસ્ટ લુણી, જોધપુર, રાજસ્થાન)ને ઝડપી પાડયા હતા. આ બન્ને મોબાઇલ ફોન ઉપર MPL નામની એપ્લીકેશન તેમજ સ્પોટબાજી નામની એપ્લીકેશન ઉપર રન ફેર સેશન ઉપર ક્રિકેટનો સટ્ટો રમાડતા હતા.

અભ્યાસ કરતા આ બન્ને યુવાનો વિમાન માર્ગે વડોદરા આવ્યા હતા અને ટિકિટ બુક કરાવી સ્ટેડિયમમાં જ સટ્ટો રમાડતા હોઇ તેમની પાસેથી 66 હજારના પાંચ મોબાઇલ ફોન, એક લેપટોપ, 10,480 રોકડા અને ટિકિટ મળી કુલ 91,480નો મુદ્દામાલ કબ્જે કરવામાં આવ્યો હતો.

જ્યારે કોલકાતાથી વિમાન માર્ગે આવેલા સબુજ પારીતોષ બિશ્વાસ (39), (રહે. રસુલાપુર, તા. ચાકદા, જિ. નોદીયા, પશ્ચિમ બંગાળ), પ્રલય પારીતોષ મિસ્ત્રી (34), (રહે. રસુલાપુર, તા. ચાકદા, જિ. નોદીયા, પશ્ચિમ બંગાળ) અને કપિલ દિપક સરકાર (35) રહે. ચૌગાછા, તા. ચાકદા, જિ. નોદીયા, પશ્ચિમ બંગાળ) આ ત્રણે યુવાનો વેલ્કી નામની વેબસાઇટમાં ક્રિકેટ સટ્ટો રમાડતા હતા. ત્રણે યુવાનો પાસેથી 1.79 લાખના 10 મોબાઇલ ફોન અને 11,030 રોકડા મળી 1.90 લાખનો મુદ્દામાલ કબ્જે કરવામાં આવ્યો હતો. રાજસ્થાન અને પશ્ચિમ બંગાળના આ પાંચેય યુવાનો સામે ક્રિકેટ સટ્ટાનો ગુનો નોંધી વધુ તપાસ જરોદ પોલીસ દ્વારા હાથ ધરવામાં આવી છે.