- એલ્યુમિનિયમ બ્રોન્ઝની 50 કિલો વજનની ડાય, એલ્યુમિનિયમના નાના-મોટા રાઉન્ડ બાર 10 નંગ અને એક રીક્ષા પોલીસે કબજે કરી

વડોદરા શહેરના મકરપુરા સ્થિત જીઆઈડીસીમાં આવેલ પટેલ એન્જિનિયરિંગમાંથી એલ્યુમિનિયમના નાના-મોટા રાઉન્ડ બાર તથા એલ્યુમિનિયમની બ્રોન્ઝ ડાયની ચોરી કરનાર ચાર ઈસમોને માંજલપુર પોલીસ મથકની ટીમ ઝડપી પાડી કાયદેસરની કાર્યવાહી હાથ ધરી છે.

માંજલપુર પોલીસ મથકની ટીમને પેટ્રોલિંગ દરમ્યાન ચોક્કસ માહિતી મળી હતી કે મકરપુરા, જીઆઈડીસી ખાતે આવેલ પટેલ એન્જિનિયરિંગ ખાતેથી એલ્યુમિનિયમના નાના-મોટા રાઉન્ડ બાર તથા એલ્યુમિનિયમની બ્રોન્ઝની ડાયની ચોરી કરનાર ઈસમો તુલસીધામ જ્યુપિટર ચાર રસ્તા મેન રોડ ઉપર રિક્ષામાં ચોરીનો સામાન લઈ વેચવા નીકળ્યા છે.

જે ચોક્કસ માહિતીને આધારે પોલીસે સ્થળ પર જઈ તપાસ કરતા માંજલપુર સોમનાથ નગરમાં રહેતો કૃણાલ કહાર, જીઆઈડીસી પાસે આવેલ ભૈરવ નગરમાં રહેતા અરુણ મકવાણા, મહેન્દ્ર પાટીલ અને જયેશ બારીયા ચોરીના મુદ્દામાલ સાથે ઝડપાયા હતા. પોલીસે એલ્યુમિનિયમના નાના-મોટા રાઉન્ડ બાર 10 નંગ એલ્યુમિનિયમ બ્રોન્ઝની 50 કિલો વજન ધરાવતી ડાય અને એક રીક્ષા કબજે કરી ચારેય ઈસમોની ધરપકડ સાથે તેઓ વિરુદ્ધ કાયદેસરની કાર્યવાહી હાથ ધરી છે.