- વિદ્યાર્થીને ગઇકાલે કમિટી સમક્ષ હાજર રહેવા માટેનો પત્ર લખ્યો હતો જોકે, વિદ્યાર્થીઓ ઉપસ્થિત રહ્યો નહોતો
વડોદરા શહેરની MS યુનિવર્સિટીની બોય્સ હોસ્ટેલના MM હોલમાં દારૂની મહેફિલનો વીડિયો વાયરલ થયો હતો. બાદમાં સયાજીગંજ પોલીસે એક વિદ્યાર્થી સહિત 3ની ધરપકડ કરી છે.
વડોદરાની MS યુનિવર્સિટીની બોય્સ હોસ્ટેલના MM હોલમાં 15 ઓગસ્ટે દારૂની પાર્ટી કરતા 3 વિદ્યાર્થીઓનો વીડિયો વાઇરલ થયો હતો. જેમાં વિદ્યાર્થીએ હોસ્ટેલના રૂમ નં.34 દરવાજો ખોલ્યો હતો અને તેમાં એક વિદ્યાર્થી અને 2 યુવાન યુનિવર્સિટીની બહારના હતા. તેઓ સાથે મળીને દારૂની મહેફિલ માણતા દેખાયા હતા અને પોતાનો ચહેરો છુપાવતા દેખાયા હતા. યુવાનો બિનધાસ્ત દારૂની પાર્ટી કરતા દેખાયા હતા.
સયાજીગંજ પોલીસે MM હોસ્ટેલમાં રહીને અભ્યાસ કરતા 20 વર્ષીય વિદ્યાર્થીની ધરપકડ કરી છે. આ ઉપરાંત તુષાર રાજેન્દ્રભાઇ મકવાણા (ઉ.27, રહે.ઇન્ડસ્ટ્રીયલ સોસાયટી, ન્યૂ સમા રોડ, વડોદરા) અને જય જયંતિભાઇ પટેલ (ઉ.27, રહે. સમન્વય વેસ્ટ બ્રિજ, ન્યુ અલકાપુરી, વડોદરા)ની ધરપકડ કરી છે. આ બંને યુવાનો કોલ સેન્ટરમાં નોકરી કરે છે.
સયાજીગંજ પોલીસ સ્ટેશનના પીઆઇ આર.જી. જાડેજાએ જણાવ્યું હતું કે, વાયરલ વીડિયોના આધારે અમે એક વિદ્યાર્થી સહિત 3 આરોપીની ધરપકડ કરી છે અને આ મામલે વધુ તપાસ શરૂ કરી છે.
ઉલ્લેખનીય છે કે, વિદ્યાર્થીને ગઇકાલે કમિટી સમક્ષ ઉપસ્થિત રહેવા માટેનો પત્ર લખ્યો હતો. જોકે, ગઇકાલે વિદ્યાર્થીઓ ઉપસ્થિત રહ્યો નહોતો. જેથી વિદ્યાર્થીને 21 ઓગસ્ટના બોલાવવાનું નક્કી કરવામાં આવ્યું હતું.
